Áıelder isteri jónindegi ulttyq komıssııanyń qoldaýymen memlekettik basqarýdaǵy áıelderdiń múmkindikterin keńeıtý jobasy bastalady

2084
Adyrna.kz Telegram
QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń otyrysy ótti. Onda komıssııanyń jańartylǵan jumys jospary men reglamenti bekitildi, dep habarlaıdy "Adyrna"" ulttyq portaly "El.kz"-ke silteme jasap.

Komıssııa tóraǵasy, Prezıdent Ákimshiligi Basshysynyń orynbasary Aıda Balaeva otyrysty ashyq dep jarııalap, Komıssııa jumysynyń negizgi basymdyǵy – adamgershilik-otbasylyq qundylyqtardy nyǵaıtý, balalardyń quqyqtary men zańdy múddelerin qorǵaý, áıelderdiń quqyqtary men múmkindikterin keńeıtý jónindegi mindetter ekenin aıtty.

«Qujat memlekettik otbasy, demografııalyq jáne genderlik saıasat salasyndaǵy ózekti mindetterdi aıshyqtaýǵa baǵyttalǵan bastamalar toptamasyn qarastyrady. Olardyń qatarynda, ana men bala ólimin azaıtý, jasóspirimder arasyndaǵy álimjettilik pen sýııdtiń aldyn alý, jynystyq zorlyq kórsetý qylmystarynan qorǵaý, Genderlik bilim ortalyǵyn qurý jáne t.b. taqyryptar bar», - dedi A. Balaeva.

Sonymen qatar, problemalyq máselelerdi sheshý úshin Ulttyq komıssııa alańynda memlekettik organdardy jedel tyńdaý kestesi qalyptastyryldy.

Josparda Komıssııanyń saraptamalyq-taldaý jumysyn júrgizý quraldary men tetikteriniń keń spektri kózdelgen. Atap aıtqanda, túrli beıimdeý jáne áleýmettik qoldaý ortalyqtaryn ádistemelik súıemeldeý qamtamasyz etiledi, qıyn ómirlik jaǵdaıǵa tap bolǵan balalar men analarǵa qajetti kómek kórsetý múmkindigin qamtamasyz etetin otbasylardyń áleýmettik kartasy jasalady.

Kún tártibi aıasynda balalar men jasóspirimderge rýhanı-adamgershilik tárbıe berý máselesi de qaraldy. Kámeletke tolmaǵandar arasyndaǵy turmystyq zorlyq-zombylyq pen qylmystyń aldyn alýǵa, balalarǵa qatysty quqyq qorǵaý quraldaryn damytýǵa baǵyttalǵan profılaktıkalyq sharalar kesheni usynyldy. Sonymen qatar, ata-analar úshin óz balalaryn tárbıeleýmen kóbirek aınalysýǵa múmkindikter jasaýǵa yqpal etetin quqyqtyq ortany damytý boıynsha naqty sharalar usynyldy.

Aqparat jáne qoǵamdyq damý vıe-mınıstri A.S. Danılov ortalyq jáne jergilikti deńgeılerdegi memlekettik basqarý júıesinde áıel basshylardyń áleýetin arttyrý boıynsha jobany iske asyrýdy usyndy.

«Jobany QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa egıdasy aıasynda BUU-nyń áıelder qurylymymen birlesip iske asyrý josparlanyp otyr. Jobaǵa túrli sarapshylar toby men basqa da halyqaralyq uıymdardy tartý kózdelýde. Joba aıasynda eldiń barlyq aımaǵyndaǵy áıelder men qyzdarǵa arnalǵan oqytý is-sharalary ótkiziledi (semınarlar, trenıngter, sheberlik sabaqtary koých sessııalar). Joba bıylǵy jyldyń shilde aıynda bastalady. Atalǵan joba eldiń saıası jáne qoǵamdyq ómirindegi áıelderdiń rólin kúsheıtýge septigin tıgizedi», dep atap ótti.

Sonymen qatar, Ulttyq komıssııa músheleri – Rıza Moldasheva men (Abaı oblysynan, «Semeı tańy» gazetiniń bas redaktory) Lázát Qojahmetovanyń («Talbesik» kóp balaly analar odaǵy» QB basshysy) baıandamasy tyńdaldy. .

Olar otbasy, mektep jáne qoǵam arasyndaǵy baılanysty nyǵaıtý tetikterin keńeıtý jóninde usynystar aıtyp, otbasylyq qundylyqtardy nyǵaıtý, bala tárbıesindegi áke ınstıtýty máselelerine, problemalyq máselelerdi sheshý monıtorıngine jáne osy baǵyttaǵy komıssııa qyzmetiniń perspektıvalaryna nazar aýdardy.

«Búgin biz azamattyq qoǵamnyń barlyq ınstıtýttaryn tarta otyryp, Prezıdenttiń genderlik saıasat salasy men barlyǵyna teń múmkindik berýge arnalǵan reformasyn ary qaraı iske asyrýǵa qajetti keshendi qadamdar qamtylǵan Jospardy bekittik. Komıssııa Josparda kórsetilgen barlyq baǵyt boıynsha qoǵammen barynsha ashyq jáne jan-jaqty baılanys ornatyp, aldaǵy ortaq jumysymyzda aldyn-alý sharalaryna úlken mán berý kerek» dedi Aıda Balaeva.

Otyrys sońynda Ulttyq komıssııa tóraǵasy memlekettik organdarǵa birqatar tapsyrmalar berdi.

"Adyrna" ulttyq portaly.

Pikirler