جەزقازعان قالاسىندا وبلىس اكىمدىگىنە جاڭا عيمارات سالىنبايدى. بۇل تۋرالى ۇلىتاۋ وبلىسىنىڭ اكىمى بەرىك ابدىعاليۇلى جەزقازعان قالاسى باس جوسپارىنىڭ ەگجەي-تەگجەيلى جوبالاۋ جوسپارىن تالقىلاعان جيىندا ايتتى.
ۇلىتاۋ وبلىسى قۇرىلىپ، جەزقازعان قالاسى وبلىس ورتالىعى رەتىندە بەلگىلەنگەن سوڭ قالادا ورتالىق، جەرگىلىكتى مەملەكەتتىك ورگاندارعا ارنالعان اكىمشىلىك عيماراتتار، الەۋمەتتىك نىساندار سالىنادى. «قازاقمىس» كورپوراتسياسىنىڭ باسشىلىعى دا وبلىس ورتالىعىندا كوپ پاتەرلى تۇرعىن ءۇي سالۋعا نيەتتى.
مەملەكەتتىك ورگاندارعا ارناپ سالىناتىن اكىمشىلىك عيماراتتار تۋرالى ءسوز بولعاندا ايماق باسشىسى ۇلىتاۋ وبلىسى اكىمدىگى ءۇشىن جاڭا عيمارات سالۋ ماسەلەسى قاراستىرىلىپ جاتپاعانىن اتاپ ءوتتى.
-كۇن تارتىبىندە ونداي ماسەلە جوق. جاقىن ۋاقىتتا ۇلىتاۋ وبلىسىنىڭ اكىمدىگىنە جاڭا عيمارات سالىنبايدى. ءبىزدىڭ نەگىزگى مىندەت –ەڭ الدىمەن الەۋمەتتىك نىساندار سالۋ. سوندىقتان دا قالا حالقىنا ىڭعايلى ورتا قالىپتاستىرۋعا كۇش سالامىز. سونىمەن قاتار، وبلىس ورتالىعىنا قونىس تەبەتىن ورتالىق مەملەكەتتىك ورگانداردىڭ بولىمشەلەرىن وڭتايلى ورنالاستىرۋىمىز كەرەك. جاڭا نىسانداردى بارىنشا بيۋدجەتتەن تىس قاراجات كوزىنەن سالۋ جولدارىن قاراستىرامىز، - دەدى بەرىك ابدىعاليۇلى.
وبلىس باسشىسى جەزقازعان قالاسى اكىمىنىڭ ورىنباسارى، قۇرىلىس، ساۋلەت، جەر قاتىناستارى بولىمدەرىنىڭ باسشىلارىمەن وتكەن جۇمىس جيىنىندا جاڭا نىساندار ءۇشىن جەر تەلىمىن بەلگىلەۋ كەزىندە قالا كەلبەتىمەن قاتار كوممۋنيكاتسيالىق جەلىلەردىڭ جۇكتەمەسى، تۇرعىنداردىڭ قاتىناۋىنا قولايلىلىعى سىندى ماسەلەلەرگە دە ەرەكشە ءمان بەرۋدى تاپسىردى.
سونىمەن بىرگە، بەرىك ابدىعاليۇلى قالانى ارالاۋ بارىسىندا ەكى قاباتتى ەسكى ۇيلەردىڭ جاي-كۇيىمەن تانىستى. ايماق باسشىسى بۇل ۇيلەردىڭ ورنىنا زاماناۋي ۇلگىدەگى قولايلى ۇيلەر سالۋ ءۇشىن ينۆەستورلار تارتۋ كەركەتىگىنە نازار اۋدارتتى.
