Jezqazǵan qalasynda oblys ákimdigine jańa ǵımarat salynbaıdy. Bul týraly Ulytaý oblysynyń ákimi Berik Ábdiǵalıuly Jezqazǵan qalasy Bas josparynyń egjeı-tegjeıli jobalaý josparyn talqylaǵan jıynda aıtty.
Ulytaý oblysy qurylyp, Jezqazǵan qalasy oblys ortalyǵy retinde belgilengen soń qalada ortalyq, jergilikti memlekettik organdarǵa arnalǵan ákimshilik ǵımarattar, áleýmettik nysandar salynady. «Qazaqmys» korporaııasynyń basshylyǵy da oblys ortalyǵynda kóp páterli turǵyn úı salýǵa nıetti.
Memlekettik organdarǵa arnap salynatyn ákimshilik ǵımarattar týraly sóz bolǵanda aımaq basshysy Ulytaý oblysy ákimdigi úshin jańa ǵımarat salý máselesi qarastyrylyp jatpaǵanyn atap ótti.
-Kún tártibinde ondaı másele joq. Jaqyn ýaqytta Ulytaý oblysynyń ákimdigine jańa ǵımarat salynbaıdy. Bizdiń negizgi mindet –eń aldymen áleýmettik nysandar salý. Sondyqtan da qala halqyna yńǵaıly orta qalyptastyrýǵa kúsh salamyz. Sonymen qatar, oblys ortalyǵyna qonys tebetin ortalyq memlekettik organdardyń bólimshelerin ońtaıly ornalastyrýymyz kerek. Jańa nysandardy barynsha bıýdjetten tys qarajat kózinen salý joldaryn qarastyramyz, - dedi Berik Ábdiǵalıuly.
Oblys basshysy Jezqazǵan qalasy ákiminiń orynbasary, qurylys, sáýlet, jer qatynastary bólimderiniń basshylarymen ótken jumys jıynynda jańa nysandar úshin jer telimin belgileý kezinde qala kelbetimen qatar kommýnıkaııalyq jelilerdiń júktemesi, turǵyndardyń qatynaýyna qolaılylyǵy syndy máselelerge de erekshe mán berýdi tapsyrdy.
Sonymen birge, Berik Ábdiǵalıuly qalany aralaý barysynda eki qabatty eski úılerdiń jaı-kúıimen tanysty. Aımaq basshysy bul úılerdiń ornyna zamanaýı úlgidegi qolaıly úıler salý úshin ınvestorlar tartý kerketigine nazar aýdartty.
