سپورت ءجۋرناليستى اسلان قاجەنوۆ جەلىدە قازاقستان اتىنان وينايتىن حوككەيشىنىڭ ەشقانداي جەڭىسكە قول جەتكىزبەسە دە، ايىنا مەملەكەتتەن ميلليونداپ اقشا الاتىنىن ايتىپ، سپورت سالاسىن باسقاراتىن ازاماتتاردىڭ ءىسىن سىنعا الدى، دەپ حابارلايدى "ادىرنا" ۇلتتىق پورتالى.
ول بۇل تۋرالى فەيسبۋكتەگى پاراقشاسىندا بىلاي دەپ جازدى:
"اشىعىن ايتۋ كەرەك، ءبىر ايلىعىمىز ءبىر اي ءومىر سۇرۋگە جەتە بەرمەيدى. ەلوردادا، تىپتەن، مۇمكىن ەمەس. امال جوق، قوسىمشا جۇمىس ىزدەيسىڭ. 4-5 جەرگە تىركەلىپ، جۇكتەمەنى ءۇيىپ الاسىڭ. تاعى دا جوبالار شىعىپ جاتسا، ودان دا باس تارتپايسىڭ. ۆووبششىم كۇنىنە 18-20 ساعات جانتالاسىپ جۇرەسىڭ. 2-3 ساعات ۇيىقتايسىڭ. ۇنەم بولسىن دەپ وبەدتەن دە باس تارتاسىڭ. ينتەرنەتتى اشاسىڭ. باااام! «بارىس» ساپىنداعى مىنا جىگىت (نيكيتا ميحايليس-حوككەيشى-رەد.) ايىنا 32 ملن تەڭگە الادى دەگەن اقپارات تۇر. 32 ملن تگ. جىلىنا - 386 500 000 تەڭگە. ءبىز ءبىر دەپۋتات 1 ملن العانىنا شامدانامىز. مىناۋىڭ 32 دەپۋتاتتىڭ اقشاسىن الىپ ءجۇر. ال، ناتيجە ءنول. بۇلاردىڭ ەلگە دە، ۇلتقا دا، سپورتقا دا اكەلىپ جاتقان ەشتەڭەسى جوق. ءبىر اۋىز قازاقشا سويلەي المايدى. قۇرلىقتىق ليگادا پلەي-وففتان ارى اسپايدى. الەم چەمپيوناتىندا 7 كوماندانىڭ 6-اۋىنان ۇتىلادى. بىراق، 32 ملن جالاقى ءجۇرىپ جاتىر".
ءجۋرناليستىڭ ايتۋىنشا، ءبىزدىڭ ەلىمىزدە سپورتشىلاردىڭ بارلىعىن، اسىرەسە، لەگيونەرلەردى "سامۇرىق" كومپانياسى قارجىلاندىرادى. ال "سامۇرىق" ول قارجىنى قايدان الىپ جاتىر؟!
"پرەزيدەنت وتكەن جولداۋىندا كاسىپقوي سپورت شىعىنىن قىسقارتۋدى تاپسىردى. ال سپورتتىڭ باسى-قاسىنداعىلارعا ءبارىبىر. باسىن ءبىر يزەدى دە، تىرلىكتەرىن جالعاستىرىپ ءجۇر. سالدارىنان وتاندىق سپورت ىشىنەن ء"ىرىپ" جاتىر. وزىمىزدەن دە كىنا بار. وسىلار حالىقتىڭ "موينىندا" وتىرعانىن بىلەمىز. ۇندەمەيمىز. سولاي بولۋ كەرەك شىعار دەپ ويلايمىز", — دەپ جازدى ول جەلىدە.
"ادىرنا" ۇلتتىق پورتالى.
