جامبىل وبلىسى توتەنشە جاعدايلار دەپارتامەنتىندە لاۋازىمدى قىزمەت اتقارعان مانسۇر شايكراموۆ بايزاق اۋدانىنداعى اسكەري بولىمدەگى جارىلىستان كوز جۇمعان ارىپتەستەرىنىڭ ولىمىنە كىنالى دەپ ايىپتالۋدا. وسىعان بايلانىستى ول مەملەكەت باسشىسى قاسىم-جومارت توقاەۆتان كومەك سۇراپ وتىر، دەپ حابارلايدى «ادىرنا» ءتىلشىسى كتك تەلەارناسىنا سىلتەمە جاساپ.
"ول وقىس وقيعا كەزىندە ءوزىنىڭ ازاماتتىق مىندەتىن ورىندادى. ەلدىمەكەنگە ءتىلسىز جاۋدىڭ تاراپ كەتۋىنە جول بەرمەدى. بارلىق كۇش سول اسكەري بولىمگە جۇمىلدىرىلدى. ەندى سول جەردە قازا تاپقان ارىپتەستەرىنىڭ ولىمىنە بۇل ازاماتتى ايىپتى ەتىپ شىعارۋ بۇل اقىلعا قونىمسىز", - دەيدى مانسۇر شايكراموۆتىڭ تۋىسى احمات داداەۆ.
ەسكە سالساق، بىلتىر بايزاق اۋدانىنداعى اسكەري بولىمدە جويقىن جارالىس بولىپ، 17 ادام اجال قۇشقان ەدى. قازا تاپقانداردىڭ ونى توتەنشە جاعدايلار قىزمەتكەرى. وسى ازاماتتارعا سول كەزدە باسشىلىق ەتكەن مانسۇر شايكراموۆ ەندى ارىپتەستەرىنىڭ ولىمىنە كىنالى دەپ كۇدىككە ىلىنگەن. اسكەري تەرگەۋ باسقارماسى سالعىرتتىق بابى بويىنشا ءىس قوزعاپ، تەرگەۋ باستاعان. كۇدىكتى ازامات ءوزىن كىنالىمىن دەپ ەسەپتەمەيدى. قازىر ول قىزمەتىنەن بوساتىلىپ، ەمىن جالعاستىرۋدا. ويتكەنى مانسۇر شايكراموۆ اسكەري قويماداعى ءورتتى اۋىزدىقتاۋ كەزىندە كوپتەگەن جاراقات العان.
ال اسكەري تەرگەۋ باسقارماسى بۇل ءىستىڭ ءمان-جايى جاريالاۋعا جاتپايدى دەگەن جەلەۋمەن تولىق اقپارات بەرمەدى. تەك وق-ءدارى ساقتاۋ قويماسىنداعى وقىس وقيعا بويىنشا ءالى تەرگەۋدىڭ اياقتالماعانىن مالىمدەدى.
