Jambyl oblysy tótenshe jaǵdaılar departamentinde laýazymdy qyzmet atqarǵan Mansur Shaıkramov Baızaq aýdanyndaǵy áskerı bólimdegi jarylystan kóz jumǵan áriptesteriniń ólimine kináli dep aıyptalýda. Osyǵan baılanysty ol memleket basshysy Qasym-Jomart Toqaevtan kómek surap otyr, dep habarlaıdy «Adyrna» tilshisi KTK telearnasyna silteme jasap.
"Ol oqys oqıǵa kezinde óziniń azamattyq mindetin oryndady. Eldimekenge tilsiz jaýdyń tarap ketýine jol bermedi. Barlyq kúsh sol áskerı bólimge jumyldyryldy. Endi sol jerde qaza tapqan áriptesteriniń ólimine bul azamatty aıypty etip shyǵarý bul aqylǵa qonymsyz", - deıdi Mansur Shaıkramovtyń týysy Ahmat Dadaev.
Eske salsaq, byltyr Baızaq aýdanyndaǵy áskerı bólimde joıqyn jaralys bolyp, 17 adam ajal qushqan edi. Qaza tapqandardyń ony tótenshe jaǵdaılar qyzmetkeri. Osy azamattarǵa sol kezde basshylyq etken Mansur Shaıkramov endi áriptesteriniń ólimine kináli dep kúdikke ilingen. Áskerı tergeý basqarmasy salǵyrttyq baby boıynsha is qozǵap, tergeý bastaǵan. Kúdikti azamat ózin kinálimin dep eseptemeıdi. Qazir ol qyzmetinen bosatylyp, emin jalǵastyrýda. Óıtkeni Mansur Shaıkramov áskerı qoımadaǵy órtti aýyzdyqtaý kezinde kóptegen jaraqat alǵan.
Al áskerı tergeý basqarmasy bul istiń mán-jaıy jarııalaýǵa jatpaıdy degen jeleýmen tolyq aqparat bermedi. Tek oq-dári saqtaý qoımasyndaǵy oqys oqıǵa boıynsha áli tergeýdiń aıaqtalmaǵanyn málimdedi.
