قازاقستان پرەزيدەنتى قاسىم-جومارت توقاەۆ باشقۇرتستان باسشىسى رادي حابيروۆپەن كەزدەسۋ وتكىزدى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
قاسىم-جومارت توقاەۆ پەن رادي حابيروۆ قازاقستان مەن باشقۇرتستاننىڭ ساۋدا-ەكونوميكالىق، ونەركاسىپ، ينۆەستيتسيا جانە مادەني-گۋمانيتارلىق سالالارداعى ىنتىماقتاستىعىن ودان ءارى نىعايتۋ ماسەلەلەرىن تالقىلادى.
كەزدەسۋ بارىسىندا مەملەكەت باسشىسى قازاقستان مەن رەسەي فەدەراتسياسى اراسىنداعى ستراتەگيالىق سەرىكتەستىكتە باشقۇرتستان رەسپۋبليكاسىنىڭ ەرەكشە ورىن الاتىنىن اتاپ ءوتتى. پرەزيدەنت ەكى ەل اراسىنداعى ساۋدا-ەكونوميكالىق قاتىناستاردىڭ قارقىندى دامىپ كەلە جاتقانىنا نازار اۋداردى.
ء“بىز قازاقستان مەن باشقۇرتستان اراسىنداعى ىسكەرلىك ىنتىماقتاستىققا قاتىستى ناقتى جوبالار جاساۋعا جانە دامىتۋعا مۇددەلىمىز. سوندىقتان سىزدەردىڭ كومپانيالارىڭىزدىڭ جەتەكشىلەرىن قازاقستانعا شاقىرامىن. ءبىز بارلىق جاعدايدى جاسايمىز. بۇعان قىزىعۋشىلىق تانىتىپ وتىرمىز. ەگەر سىزدەردىڭ تاراپىڭىزدان يندۋستريالىق الەۋەتى ەسكەرىلگەن وتە ماڭىزدى بىرلەسكەن جوبالار ۇسىنىلسا، جۇمىسىمىز جەمىستى بولادى دەپ ويلايمىن”، –دەدى پرەزيدەنت توقاەۆ.
مەملەكەت باسشىسىنىڭ ايتۋىنشا، باشقۇرتستان ءداستۇرلى تۇردە قازاقستان مەن رەسەيدىڭ ايماقارالىق ىنتىماقتاستىعىن نىعايتۋعا ەلەۋلى ۇلەس قوسۋدا. ونىڭ پىكىرىنشە، ءتۇرلى باعىتتار بويىنشا ءوزارا ىقپالداستىقتى كەڭەيتۋگە الەۋەت جەتكىلىكتى جانە قازاقستان ونى تولىققاندى ىسكە اسىرۋعا نيەتتى.
ءوز كەزەگىندە رادي حابيروۆ كەزدەسۋگە مۇمكىندىك بەرگەنى ءۇشىن قاسىم-جومارت توقاەۆقا العىس ءبىلدىرىپ، قازاقستانمەن اراداعى ىنتىماقتاستىقتى دامىتۋدىڭ ستراتەگيالىق ماڭىزى بار ەكەنىن اتاپ ءوتتى.
“ باشقۇرتستان قازاقستاننىڭ بيزنەسىمەن جۇمىستى ودان ءارى جالعاستىرۋعا اسا مۇددەلى. ءبىز ءۇشىن بۇل وتە ماڭىزدى. وسى ۋاقىت ارالىعىندا قول قۋسىرىپ وتىرعانىمىز جوق. مەنىڭ قازاقستانعا ساپارىم بارىسىندا بىرقاتار كەلىسىمدەر جاسالىپ، ۋاعدالاستىقتارعا قول جەتكىزىلدى جانە ولاردىڭ ءبارى جۇزەگە اسىرىلدى. ەڭ الدىمەن، ءوزارا قارىم-قاتىناس ينفراقۇرىلىمىن جولعا قويدىق”، – دەدى رادي حابيروۆ.
”ادىرنا” ۇلتتىق پورتالى
