تۇركياداعى ءزىلزالادان قازا تاپقاندار سانى 35 418 ادامعا جەتتى. بۇل تۋرالى تۇركيا پرەزيدەنتى رەجەپ تايىپ ەردوعان تەلەۇندەۋ جولدادى، دەپ حابارلايدى “ادىرنا” ۇلتتىق پورتالى.
انادولى اگەنتتىگىنىڭ مالىمەتىنشە، جينالىس تۇركيانىڭ توتەنشە جاعداي سالدارىن جويۋ باسقارماسىنىڭ انكاراداعى شتاب-پاتەرىندە ءوتتى.
اقپارات بويىنشا، جاراقات العان 13 208 ادام اۋرۋحانالاردا ەم الىپ جاتىر.
سونداي-اق، تۇرىك باسشىسى بۇكىل الەمنىڭ ساراپشىلارى تۇركياداعى جەر سىلكىنىسىن «ايرىقشا تابيعات قۇبىلىسى» دەپ اتاعانىن ايتىپ ءوتتى.
پرەزيدەنت ەردوعاننىڭ سوزىنشە، اپات ايماعىنداعى ىزدەۋ-قۇتقارۋ جانە باسقا دا جۇمىستارعا 250 مىڭعا جۋىق مەملەكەتتىك قىزمەتكەر تارتىلعان. ول ءزىلزالا قيراتقان اۋداندارداعى ىزدەۋ-قۇتقارۋ جۇمىستارى ءۇيىندى استىنداعى ءتىرى ادامدار امان شىعارىلعانعا دەيىن جالعاساتىنىن اتاپ ءوتتى.
ەردوعاننىڭ ايتۋىنشا، كەلەسى ايدا تۇركيا بيلىگى ءزىلزالادان زارداپ شەككەندەرگە ارنالعان 30 000 ءۇيدىڭ قۇرىلىسىن باستايدى. قازىرگى ۋاقىتتا 1,6 ملن ادام باسپاناعا مۇقتاج.
«اپات ايماعىندا 175 مىڭ پالاتكا، 5,4 مىڭ كونتەينەر ۇلگىسىندەگى ءۇي ورناتىلعان»، دەپ اتاپ ءوتتى ەردوعان.
سونداي-اق، ول تۇركيا بيلىگى ءزىلزالا بولعان ايماقتاردىڭ بارىندە جىل بويى ساپاسى جوعارى ءارى ادامدارعا قاۋىپسىز تۇرعىن ۇيلەردىڭ قۇرىلىسىن اياقتاۋدى جوسپارلاپ وتىر. ال اپات ايماعىندا 28 مىڭ تۇرىك ساربازى كەزەكشىلىكتە تۇر.
«تۇركيا ۋاقىتى بويىنشا 15 اقپان، 20:00-دە تۇركيا، ازەربايجان جانە سولتۇستىك كيپردەگى تۇرىك رەسپۋبليكاسىندا «تۇركيا – ءبىر جۇرەك» ۇرانىمەن جەر سىلكىنىسىنەن زارداپ شەككەندەرگە كومەك كورسەتەتىن ناۋقان بولادى»، - دەدى رەجەپ ەردوعان.
