قوستانايدا شەنەۋنىكتەر احمەت بايتۇرسىنوۆ تۋعان تاريحي ءۇيدى ءسۇرىپ تاستادى

2515
Adyrna.kz Telegram
فوتو: orda.kz
فوتو: orda.kz

قوستانايدا شەنەۋنىكتەر احمەت بايتۇرسىنوۆ تۋعان تاريحي ءۇيدى ءسۇرىپ تاستادى. قازىر بۇل جەردە اۋىر تەحنيكانىڭ ءىزى عانا قالدى، دەپ حابارلايدى “ادىرنا” ۇلتتىق پورتالى.

حالىق اعارتۋ ءىسىنىڭ ءجۇز ەلۋ جىلدىق مەرەيتويىندا كىرپىش ءۇيدى قالپىنا كەلتىرۋ تۋرالى شەشىم قابىلداندى. ەسكى ىرگەتاس ورنىندا مەردىگەر قۇمبلوك قابىرعالارىن تۇرعىزا باستادى. ولار ساپاسىز بولىپ شىقتى.

جەرگىلىكتى تۇرعىندار مادەني نىساننىڭ نەلىكتەن جەرمەن-جەكسەن بولعانىن تۇسىنبەيدى.

وبلىستىڭ كيەلى كارتاسىنداعى نىسان ءبىر اي بۇرىن بۇزىلعان. قۇرىلىسشىلار ءتىپتى باستاپقى ىرگەتاسىن دا ساقتاي المادى. ونى ون ءۇش جىل بۇرىن جەرگىلىكتى تۇرعىندار ەسكى ىرگەتاستىڭ ورنىنا سالعان. ولار دا جاعدايدى باقىلاپ وتىردى: شاتىردى اكتەپ، سىرلاپ، جاماپ تاستادى. قازىر بۇل جەردە اۋىر تەحنيكانىڭ ءىزى عانا قالدى.

“مىناۋ ارادا احمەتتىڭ بۇرىنعى ءۇيىنىڭ ءىزى بولعان. فۋندامەنتى بۇنىڭ قارا شىمنان كەسەكتەن سالىنعان ەدى. مىنە، قاراپ وتىرساڭدار جوباسى وسى جەردەن. مىناۋ ارادا پەشپەن بولىنگەن ەدى. سول پەشپەن بولىنگەن بۇرىشتا ءبىزدىڭ احمەت اتامىزدىڭ ۇيىندەگى اجەمىز وسى جەردە احمەت اتامىزدى دۇنيەگە اكەلدى-اۋ دەپ ءوزىمىز ويلايتىن ەدىك. استان-كەستەنى شىققان. ءىزى دە قالماعان، دىمى دا قالماعان. ەڭ سوڭعى احمەتتىڭ وزىمىزدە بار ەسكەرتكىشىنەن ايىرىلىپ قالىپ تۇرمىز”، – احمەت بايتۇرسىنۇلى اۋىلىنىڭ تۇرعىنى جاقسىبەك ابدىسالىق.

بايتۇرسىنوۆتىڭ ءۇيىن قالپىنا كەلتىرۋگە بيۋدجەتتەن 22 ميلليون تەڭگە ءبولىندى. بىراق قۇرىلىس توقتاتىلدى. الماتىلىق مەردىگەر جۇمىس ىستەگەن ماتەريال قابىلدانبادى.

شەنەۋنىكتەردىڭ ايتۋىنشا، جەرگىلىكتى تۇرعىندار ءۇيدى وزدەرى بۇزۋدى سۇراعان. بۇل تۋرالى جيىنداردا تالاي رەت ايتىلدى.

“ەكى اۋىلدىڭ تۇرعىندارى ءۇيدىڭ اپاتتى جاعدايدا ەكەنىن ايتىپ، ماسەلە كوتەردى. اۋدان، وبلىس اكىمدىكتەرىنە جۇگىندى. سوندىقتان ءبىز وسىنداي شەشىم قابىلدادىق”، – دەدى احمەت بايتۇرسىنۇلى اۋىلىنىڭ اكىمى نۇرسۇلتان ءبايدىلدين.

وسى كەزدەسۋلەردىڭ ناتيجەسىندە احمەت بايتۇرسىنۇلى تۋعان ءۇيدىڭ ورنىنا مۇراجاي-ءۇي سالۋدىڭ جاڭا جوبالىق قۇجاتتاماسىن ازىرلەۋ تۋرالى شەشىم قابىلداندى. تۇرعىن ءۇي قايتا سالىنادى. اۋدان اكىمدىگى جاڭا مەردىگەر ىزدەۋدە. جوبانىڭ قۇنى وتىز جەتى ميلليون تەڭگەگە دەيىن ءوستى.

“ جوبا بويىنشا 149 شارشى مەتر. تۇرعىن ءۇيدى مۋزەي ءۇي ەتىپ، قايتا قالپىنا كەلتىرۋ جۇمىستارىن جۇرگىزەدى. جوباسى 20 ماۋسىمدا الىنادى. پسد-نى جوبالاۋعا 1,2 ملن تەڭگە دەمەۋشىلەر اتىنان ىستەلەدى. ال ەندى ءۇيدىڭ قۇنى 37 ملن بوپ تۇر. ەكسپەرتيزاعا دەيىن. ەندى ول وزگەلەردى ءالى”، – جانگەلدى اۋداندىق قۇرىلىس ءبولىمىنىڭ باسشىسى ادىلبەك يمانعاليەۆ.

شەنەۋنىكتەر مەردىگەردى تاڭداپ جاتسا، جەرگىلىكتى تۇرعىندار احمەت بايتۇرسىنۇلىنىڭ تۋعان اۋىلىنا كىرە بەرىستەگى كەسەنەنىڭ قۇرىلىسىن اياقتاپ جاتىر. اۋىل تۇرعىندارى 10 ميلليون تەڭگە جيناپ، ەسكەرتكىشتى ءوز كۇشتەرىمەن تۇرعىزىپ جاتىر.

”ادىرنا” ۇلتتىق پورتالى

پىكىرلەر