شىمكەنت - جاستاردىڭ، ستۋدەنتتەردىڭ قالاسى. قالاداعى 8 جوعارى جانە 37 ورتا ارناۋلى وقۋ ورنىندا 121 246 ستۋدەنت ءبىلىم الىپ جاتىر.
الايدا ستۋدەنتتەرگە ارنالعان 36 جاتاقحانادا نەبارى 10 679 ورىن بار. دەمەك ستۋدەنتتەردىڭ 8,8 پايىزى عانا جاتاقحانادان ورىن تابا الادى.
جاتاحقانا ماسەلەسى جالپى ەلىمىزدە وزەكتى بولىپ وتىر. وسى جاعداي ەسكەرىلىپ، مەملەكەت جاتاقحانا ماسەلەسىن قولعا الىپ، قارجىلاندىرا باستادى.
مەملەكەتتىك قولداۋدىڭ ارقاسىندا بىلتىر شىمكەنتتە جالپى 1174 ورىندىق 3 جاتاقحانا سالىندى.
كۇنى بۇگىن، قالا كۇنى قارساڭىندى ءا.قۋاتبەكوۆ اتىنداعى حالىقتار دوستىعى ۋنيۆەرسيتەتىنىڭ جانىنان 290 توسەكورنى بار جاتاقحانا اشىلدى.
ستۋدەنت كەزىمدە جاتاقحانادا تۇرعان ادام رەتىندە ايتايىن، بۇگىن اشقان جايدىڭ اتى جاتاقحانا بولماسا، قۇددى ءبىر قوناقۇي سياقتى. ءار قاباتتا اسحانا، كيىم جۋاتىن بولمە، سپورتزال، ءار سەكتسيادا اجەتحانا مەن دۋش، ءبىرىنشى قاباتتا مەديتسينا بولمەسى.
كەزىندە جاتاحقانادا ءوز بولمەمىزدە تاماق تا ىستەيتىنبىز، كيىم دە جۋاتىنبىز، ساباق تا دايىندايتىنبىز. قۋىقتاي بولمەدە قوناق تا كۇتەتىنبىز. اۋىلدان كەلگەن اعايىن دا تۇنەپ كەتەتىن.
مەنىڭ جەكە ويىمشا، جاتاحقانادا تۇراتىن ستۋدەنتتەر تەز الەۋمەتتەنەدى، ءومىردىڭ مەكتەپ ۇيرەتپەگەن زاڭدىلىقتارىن تەز ۇيرەنەدى، ەموتسيالىق زەردەسى دامي تۇسەدى، جەكە ومىرگە تەز بەيىمدەلەدى.
نە كەرەك، ستۋدەنتتەرگە جاتاحقانادا تۇرىپ، اتالعان ارتىقشىلىقتاردى باستان وتكەرۋ ءۇشىن جىل سوڭىنا دەيىن تاعى دا بىرنەشە جاتاقحانا اشۋدى جوسپارلاپ وتىرمىز.
شىڭعىس مۇقان
ينستاگرام پاراقشاسىنان
