اقش-تا سەناتورلار قارۋدى ساتۋ ەرەجەلەرىن قاتاڭداتۋ بويىنشا كەلىسىمگە كەلدى. بۇل تۋرالى قوس پارتيا وكىلدەرى مالىمدەدى، دەپ حابارلايدى “ادىرنا” ۇلتتىق پورتالى.
ەندى 21-گە تولماعان ازاماتتارعا قارۋ ساتپاس بۇرىن ولاردىڭ جەكە مالىمەتتەرى ءجىتى تەكسەرىلەدى. وسىلايشا جالعان قۇجات ارقىلى قارۋ ساتىپ الۋ ءتارتىبى جويىلادى. اقش بيلىگىنىڭ مۇنداي شارا قابىلداۋىنا قارۋ قولدانعان قايعىلى وقيعالاردىڭ جيىلەپ كەتۋى سەبەپ.
ءتيىستى زاڭ جوباسىن وتكەن اپتادا وكىلدەر پالاتاسى بەكىتتى. ەندى قۇجاتتى سەنات تالقىلاۋى ءتيىس.
“بۇل زاڭ جوباسىن ازىرلەۋ بارىسىندا اۋقىمدى ۇسىنىستار ايتىلدى. مەنىڭ ويىمشا، زاڭ ەلگە كوپ وزگەرىس اكەلەدى. بۇل سوڭعى ونجىلدىقتا جۇرگىزىلگەن جۇمىستاردىڭ ناتيجەسى. سەبەبى ءبىزدىڭ ەلدە كەز كەلگەن الەۋمەتتىك وزگەرىستەر ءۇشىن ۋاقىت كەرەك. زاڭ شىعارۋشى جۇيەمىز سولاي قۇرىلعان”،- دەدى Brady توبىنىڭ ساياسات جونىندەگى ۆيتسە-پرەزيدەنتى كريستيان حەين.
”ادىرنا” ۇلتتىق پورتالى
