10 ماۋسىمدا "قۇرىلىسمەت" جشس اۋماعىندا "ارسەلورميتتال تەمىرتاۋ" اق قىزمەتكەرلەرىمەن جازاتايىم وقيعا ورىن الدى. بۇل تۋرالى قاراعاندى وبلىسىنىڭ اكىمدىگى مالىمدەدى، دەپ حابارلايدى “ادىرنا” ۇلتتىق پورتالى.
“وتقا ءتوزىمدى كىرپىش قالاۋىن بولشەكتەۋ كەزىندە ۇستا-پرەسس تسەحىنىڭ № 9 جۇمىس ىستەمەيتىن تەرميالىق پەشىندە توبە قۇلادى. پەش كۇمبەزىنىڭ قۇلاۋى ناتيجەسىندە (كولەمى 5ح5ح10 م) ۇيىندىلەردىڭ استىندا بەس ادام قالدى. ولاردىڭ تورتەۋى قايتىس بولدى، بىرەۋى 1994 جىلى تۋعان ەر ادام اۋرۋحاناعا جەتكىزىلدى”، دەلىنگەن حابارلامادا.
قازىرگى ۋاقىتتا قاراعاندى وبلىسى تجد قۇتقارۋشىلارى (27 ادام جانە 7 بىرلىك تەحنيكا) جانە "سەرىكتەس ءورت ءسوندىرۋشى" جشس قىزمەتكەرلەرى (10 ادام جانە 2 بىرلىك تەحنيكا) ۇيىندىلەردى ارشۋدا.
وقيعا ورنىندا قاراعاندى وبلىسىنىڭ اكىمى جەڭىس قاسىمبەك، تجد جانە ونەركاسىپتىك قاۋىپسىزدىك باسشىلارى بار.
قر ەڭبەك كودەكسىنىڭ تالاپتارىنا سايكەس ەڭبەك جونىندەگى ۋاكىلەتتى ورگاننىڭ وكىمىمەن كوميسسيا قۇرىلادى جانە جازاتايىم وقيعاعا ارنايى تەكسەرۋ جۇرگىزىلەدى. ناتيجەلەر تۋرالى قوسىمشا حابارلاناتىن بولادى.
”ادىرنا” ۇلتتىق پورتالى
