بەلگىلى اقىن سۆەتقالي نۇرجان الەۋمەتتىك جەلىدەگى پاراقشاسىندا قازاقستاندا ماۋسىم كۇنى وتكەن رەفەرەندۋمعا بايلانىستى جازعان مۇحامەتجان تازابەكتىڭ ولەڭىن سىناپ جازدى، دەپ حابارلايدى “ادىرنا” ۇلتتىق پورتالى.
«تومەندەگى بەتپاق شاتقان شاتپاق الەم-جالەمدە “حيت” بولىپ جاتىر ەكەن. نايەتى، وسى ادامنان ازعان پالەكەتتەرگە ءسوز شىعىنداۋ اۋزىما قانشالىقتى ىلايىق دەپ ويلاۋعا دا بولار ەدى، بىراق بۇلاردىڭ وتانىمىزعا سالعان 30 جىلدىق ىلاڭى جانە شەكسىز ارسىزدىعىمەن تاعى دا قازاقتى اقىماق كورىپ، الداماق بولىپ، ءسويتىپ ءار جەر، ءار جەردەن جىلتىڭداپ كورىنگىسى، جاعىنعىسى، تاعى ساناتقا ەنگىسى، ساپقا كىرگىسى كەلىپ تۇراتىن سۇمپايىلىقتارى جۇرەكتى اينىتادى! ال اينىعان جۇرەكتەن قاي ءبىر وڭعان ولەڭ شىقسىن؟! بۇل دا سونداي ءبىر كەپ»، - دەيدى Facebook جەلىسىندە ايت-مان نۇرجان دەگەن اتپەن تىركەلگەن اقىن.
بۇدان ارى اقىن تازابەكتىڭ ۇيقاسىنا سالىپ، بىرەر جول ولەڭ جازادى. ولەڭىندە ءانشى، ەكس-دەپۋتات، تۇركياداعى بۇكىلالەمدىك ەتنوسپورت فەدەراتسياسىنىڭ ءبىرىنشى ۆيتسە-پرەزيدەنتى بەكبولات تىلەۋحاننىڭ دا اتى اتالادى. اقىن بۇل ەكەۋىن قازاقستانداعى ءدىني اعىم سالافيزم اعىمى ءۇشىن كىنالاپتى.
جالپى، سۆەتقالي نۇرجان قازاقستاندا 2000 جىلداردىڭ باسىندا كەڭ جايىلعان تاعى ءبىر ءدىني اعىم – ءسۋفيزمنىڭ (سوپىلىق) بەلدى وكىلى رەتىندە ءجيى اتالادى. ول وسى اعىمنىڭ قازاقستانداعى نەگىزىن سالۋشى يسماتۋللا ماقسىمنىڭ قاسىنان ءجيى كورىنىپ قالادى.
ەسكە سالا كەتەيىك، 5 ماۋسىم كۇنى مۇحامەتجان تازابەك كونستيتۋتسياعا وزگەرىس ەنگىزۋ ءۇشىن وتكەن بۇكىلحالىقتى رەفەرەندۋمعا بارىپ، داۋىس بەرگەنىن ولەڭمەن جازىپ، الەۋمەتتىك جەلىدە سىنعا ۇشىراعان. ول قازىر شەتەلدە ءجۇر. ەل اراسىندا «وسى اعىمنىڭ سەركەسى قايرات ساتىبالدى قاماۋعا الىنعان سوڭ، تازابەكتەر شەتەلدە بوي تاسالاپ ءجۇر» دەگەن بولجام ايتىلادى.
”ادىرنا” ۇلتتىق پورتالى
