يسپانيانىڭ وڭتۇستىگىندەگى ورمان ورتەنىپ بەناحاۆيس قالاسىنان 2 مىڭ ادام ەۆاكۋاتسيالاندى. بۇل تۋرالى Reuters اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
باسىلىم مالىمەتىنشە، ءورت كوستا-دەل-سول ۇستىندەگى سەررا-بەرمەجاداعى پۋجەررا تاۋىنىڭ باۋرايىندا باستالعان. اندالۋسيا ورمان ورتتەرىن باقىلاۋ دەپارتامەنتىنىڭ (INFOCA) Twitter جەلىسىندە بۇعان ىستىق اۋا رايى مەن قولايسىز جەل سەبەپ بولعانى جازىلدى.
بيلىك تۇرعىنداردى كەشكە ەۆاكۋاتسيالاۋعا كىرىستى، ادامدار مالاگا پروۆينتسياسىنىڭ بەس اۋدانىنان شىعارىلدى. سونىمەن قاتار، توتەنشە جاعدايلار قىزمەتى 7 مىڭ ادام تۇراتىن شاتىرلار تىككەن، بىراق ەۆاكۋاتسيالانعانداردىڭ كوپشىلىگى تۋىستارى مەن جەرگىلىكتى قوناقۇيلەرگە ورنالاستىرىلدى.
سونىمەن قاتار، وقيعا ورنىندا 200-دەن اسا ءورت ءسوندىرۋشى جۇمىس ىستەپ جاتىر. سونداي-اق، كوستا-دەل-سول ايماعىنداعى باسقا قالالاردان 100 اسكەري قىزمەتكەر مەن 50 ءورت ءسوندىرۋشى جۇمىلدىرىلدى. جالىنمەن كۇرەسۋ بارىسىندا ءۇش ءورت ءسوندىرۋشى زارداپ شەكتى، ولاردىڭ ءبىرى اۋىر كۇيىكپەن مالاگا اۋرۋحاناسىنا جەتكىزىلگەن.
“ادىرنا” ۇلتتىق پورتالى
