وزبەكستاندا تاشكەنت وبلىسىنداعى شىرشىق قالاسىندا ورنالاسقان حيميا زاۋىتىندا ءورت شىقتى. بۇل تۋرالى وزبەكستاننىڭ توتەنشە جاعدايلار مينيسترلىگىنىڭ مالىمدەدى، دەپ حابارلايدى “ادىرنا” ۇلتتىق پورتالى.
«4 قازان كۇنى ساعات 8:40-تا تاشكەنت وبلىسى شىرشىق قالاسىندا ورنالاسقان «ماكسام چيرچيك» اق كاسىپورنىنىڭ سينتەزدەۋ تسەحىندا جارىلىس بولعانى تۋرالى حابار كەلىپ ءتۇستى. وقيعا ورنىنا تاشكەنت وبلىسى توتەنشە جاعدايلار دەپارتامەنتى باسشىلىعى مەن قىزمەتكەرلەرى جانە ارنايى تەحنيكالار كەلدى. قازىرگى ۋاقىتتا قالىپتاسقان جاعدايدىڭ سالدارى جويىلۋدا. جاعداي باقىلاۋدا» دەلىنگەن حابارلامادا.
تاشكەنت وبلىسىنىڭ ازاماتتىق قورعاۋ باسشىسى – وبلىس اكىمى زوير ميرزاەۆ ءتيىستى باسشىلارعا جاعدايدى تەز ارادا رەتتەۋدى تاپسىردى. وقيعانىڭ سەبەپتەرى مەن سالدارى انىقتالىپ جاتىر.
”ادىرنا” ۇلتتىق پورتالى
