بۇگىن "وزەنمۇنايگاز" اق عيماراتىنىڭ الدىنا ءبىر توپ ادام جينالىپ، جالپى كەزەكتەن اينالىپ ءوتىپ، كومپانياعا جۇمىسقا ورنالاسۋدى تالاپ ەتتى، دەپ حابارلايدى "ادىرنا" ۇلتتىق پورتالى جاڭاوزەن قالاسى اكىمدىگىنىڭ ءباسپاسوز قىزمەتىنە سىلتەمە جاساپ.
تالاپتارى ورىندالمايتىنىن بىلگەننەن كەيىن س.ك. جانە س.ت. (بۇرىن سوتتالعان) ەسىمدى ەكى ازامات الدىڭعى قۇرساق قابىرعاسى مەن يىق جانىنان ۇستارا پىشاعىمەن (لەزۆيا) دەنە جاراقاتىن كەلتىردى (تەرەڭ ەمەس). ەكەۋى دە قالالىق اۋرۋحاناعا جەتكىزىلدى.
ولاردى دارىگەرلەر قابىلداۋ بولمەسىندە تەكسەردى. ومىرلەرىنە قاۋىپ جوق. اۋرۋحاناعا تۇسكەندەردىڭ ءبىرى ەمدەلۋدەن باس تارتىپ، اۋرۋحانادان شىعىپ كەتتى.
جوعارىدا اتالعان ازاماتتار بۇرىن ارنايى وقۋدان ءوتىپ، 1 ماۋسىمدا جالاقىسى 250 مىڭ تەڭگە بولاتىن جەكە كومپانياعا جۇمىسقا ورنالاسقان بولاتىن.
ولارعا مۇناي-گاز سالاسىنا جۇمىسقا ورنالاسۋ قابىلدانعان الگوريتمگە سايكەس، جالپى كەزەك تارتىبىمەن ءجۇرىپ جاتقانى جونىندە بىرنەشە رەت تۇسىندىرىلگەن بولاتىن. الگوريتمدى بۇزىپ، كەزەكتەن تىس جۇمىسقا ورنالاسۋ باسقا جۇمىسقا ورنالاسۋعا ۇمىتكەرلەرگە ادىلەتسىز بولادى.
"ادىرنا" ۇلتتىق پورتالى
