شىمكەنت قالاسىندا NEET ساناتىنداعى جاستار، ياعني نە وقۋى، نە جۇمىسى جوق قۇلىقسىز 14 مىڭعا جۋىق جەتكىنشەك بار. "جاستاردى الەۋمەتتەندىرۋ جانە وڭالتۋ" جوباسىنىڭ اياسىندا "ادىرنا"ۇەب قق ۇيىمداستىرۋىمەن قوعامدا ورنىن تاپپاي جۇرگەن وسىنداي جاستاردى ىنتالاندىرۋ ءۇشىن وڭتۇستىككە بەلگىلى بلوگەر مەن كاسىپكەرلەر كەلدى.
جوبا جاستاردىڭ جۇمىس جانە وقۋعا كەلگەندە بەلسەندىلىك تانىتپاۋ سەبەپتەرى، جوبالىق كەڭسە تاراپىنان جاستارعا كومەك بەرۋ جانە كاسىبي باعدارلاۋ تۇرلەرى، NEET جاستارىنىڭ قوردالانعان ماسەلەلەرىنىڭ شەشۋ جولدارىن قاراستىرۋعا باعىتتالعان.
ءىس-شارا جاستاردى بولاشاق ومىرلىك جوسپارلارىنا ىنتالاندىرۋ جانە شىعارماشىلىق الەۋەتتى دامىتۋ باعىتىندا ىسكە اسىرىلدى.
اتالمىش كونفەرەنتسيا شىمكەنت قالاسىندا، جاستار رەسۋرستىق ورتالىعىندا ءوتتى. شارا قوناقتارى بەلگىلى بلوگەر، اكتەر نۇرسۇلتان جاقسىگەن مەن كاسىپكەر، بلوگەر اقارىس ءادىلجان جاستارعا كاسىپ اشۋدىڭ قىر-سىرىن ايتىپ، ماقساتقا ۇمتىلۋداعى تاجىريبەلەرىمەن ءبولىستى.
"جاستارعا ايتارىم، ءوز ىستەرىڭىزدى سۇيىڭىزدەر. نەگە دەسەڭىزدەر، ادام ءوزىنىڭ جانى قالاعان، سۇيىكتى ىسىمەن اينالىسقاندا جۇمىس جاسامايدى، تەك جاساعان دۇنيەسىنەن ءلاززات الادى. ماسەلەن ءبىز كەزىندە جايدارمان ويناپ جۇرگەنىمىزدە جاي عانا ءوز ىسىمىزدەن ءلاززات الىپ، سول ءىستى جاقسى كورگەندىكتەن جان تانىمىزبەن بەرىلە وينايتىنبىز. سول ۋاقىتتا سول دۇنيەنىڭ بىزگە ارتىنشا تابىس الىپ كەلەتىنىن، كاسىبىمىزدىڭ ءناسىپ بولىپ كەلەتىنىن ويلاماپپىز. جاقسى كورەتىن دۇنيەمىزدى جاسادىق، بارىمىزدى سالدىق، حالىقتىڭ سۇيىكتىسىنە اينالدىق، ينستاگرام دامىپ باستادى، كونتەنتىمىزدى باستادىق، كورەرمەننىڭ كوڭىلىنەن شىقتىق، وسىلايشا بۇگىندە بلوگەرلىكتىڭ ارقاسىندا نان تاۋىپ ءجۇرمىز راسىنا كەلگەندە" دەدى نۇرسۇلتان جاقسىگەن.
"بلوگەرلىك تە - كاسىپ" دەيدى كونفەرەنتسيا قوناقتارى. ولاردىڭ ايتۋى بويىنشا ءتىپتى بۇگىنگى تاڭداعى جوسپارلى ماقساتتارىنىڭ كوبىنە بلوگەرلىكتەرىنىڭ ارقاسىندا جەتىپ وتىرعاندارىن ايتا كەتتى.
جاس بولسا دا ءوز كاسىبىن دوڭگەلەتىپ، سونىمەن بىرگە بلوگەرلىكتى دە قاتار الىپ جۇرگەن اقارىس ءادىلجان شىمكەنتتىك جاستاردىڭ الدىندا ءوزىنىڭ كەڭەستەرىمەن ءبولىسىپ، جەتىستىككە جەتەمىن دەگەن ادامنىڭ 10 قاعيداسى جونىندە ايتىپ، جاستارعا جىگەرلى سوزدەرىن جولدادى:
"قازىرگى تاڭدا NEET ساناتىنداعى جاستاردىڭ كوبەيىپ كەتۋىنىڭ سەبەبى، ولاردىڭ ءوز ىستەرىن تابا الماۋىندا جانە ءوز-وزدەرىن جوعالتىپ الۋىندا. ول ءۇشىن اۋەلى ادام ءوز يكيگايىن، ياعني جانىنا جاقىن ءىسىن تاۋىپ سول ارقىلى قاراجات تابۋدى كوزدەۋ قاجەت. سوندا عانا ول ءومىر بويى جۇمىس ىستەگەن بولمايدى، تەك ومىردەن ءلاززات الا وتىرا، تابىس تاپقان بولادى. مەن وسى ۋاقىتقا دەيىنگى وقىعان كاسىپكەرلىك باعىتتاعى كىتاپتارىمدا ءجيى بايقايتىنىم، بۇل ارمانداۋ، ماقسات كويۋ، نيەت ەتۋ، ارەكەت جاساۋ، جەتىستىككە جەتۋ. وسىلاي عانا ادام بالاسى ءوز دەگەنىن ورىنداي الادى" دەدى ول سوزىندە.
اقارىس ءادىلجان جاستارعا ايتقان 10 قاعيداسىندا: ۋاقىتتىڭ قادىرى; ومىرلىك ميسسيا; سۇزگى; "نە قالايتىنىمدى بىلمەيمىن"; يكيگاي; ماقساتتى دۇرىس قويۋ; 5 نە ءۇشىن; 5 قالاي; حات جازۋدى ۇيرەنۋ، "جوق" دەگەن سوزدەن قورىقپاۋ تۋرالى ايتتى. كوزدەرىندە جەتىستىككە جەتەم دەگەن جالىنى بار جاستار، اقارىستىڭ ايتقاندارىن جازىپ الىپ، ءوز تۇيگەندەرى بويىنشا سۇراق قويىپ، كەڭەستەر الدى.
كەزدەسۋگە اتامەكەن كاسىپكەرلەر پالاتاسىنان جانە جۇمىسپەن قامتۋ ورتالىعىنىڭ قىزمەتكەرلەر كەلىپ قازىرگى تاڭدا يدەيالارى، ءوز باستامالارى بار جاستاردى مەملەكەت قالاي قولدايتىنى جونىندە تۇسىندىرمە جۇمىستارىن جۇرگىزدى. ولارعا جاستار سۇراق قويىپ، كوكەيلەرىن مازالاعان ساۋالدارىنا جاۋاپ الدى.
"NEET جاستار توبى ادەتتە سالعىرت كەلەدى. ولار بىلىكتىلىك ارتتىرۋعا، جۇمىس ىستەۋ مەن وقۋعا نيەتتەنبەيدى. ولاردىڭ كوبىنىڭ سىني ويلاۋ داعدىلارى تومەن ءارى تۇتىنۋشىلىق مىنەز-قۇلقى باسىم بولادى. دەگەنمەن، ەلىمىزدە NEET جاستاردى انىقتاۋ، ولاردىڭ مۇقتاجدىقتارىن، قۇندىلىقتارىن زەرتتەۋ ءادىسناماسى زەردەلەنۋى كەرەك. "جاستاردى الەۋمەتتەندىرۋ جانە وڭالتۋ" جوباسى قر اقپارات جانە قوعامدىق دامۋ مينيسترلىگىنىڭ جانە ازاماتتىق باستامالاردى قولداۋ ورتالىعىنىڭ قولداۋىمەن ىسكە اسىپ جاتىر. نەگىزگى ماقساتىمىز دا وسى. ياعني اتالمىش ساناتتاعى جاستاردىڭ سانىن ازايتۋ، ولاردى جىگەرلەندىرۋ، باستامالارىن قولداۋ، كومەك كورسەتۋ" دەدى "ادىرنا" قوعامدىق قورىنىڭ پرەزيدەنتى ارمان اۋباكىر.
كەزدەسۋدە شىمكەنتتىك بەلسەندى رۇستەم اشەتاەۆ ءسوز سويلەپ جاستاردىڭ قوعامداعى ورنىن، ولاردىڭ ومىردەگى ميسسياسى نە بولۋ كەرەكتىگىن، ولاردىڭ قالىپتاسۋىنا قانداي ورتانىڭ زور ىقپال ەتەتىنى جونىندە ايتا كەتتى:
"ادامنىڭ ءۇش ورتاسى بولادى. ءبىرىنشىسى، وتباسى ياعني ونىڭ تاربيە العان مەكەنى، ەكىنشىسى دوستارى، جانىندا جاقسىلىقتا دا، قۋانىشتا دا قاتار جۇرگەن جاندارى، ءۇشىنشىسى وسى ەكەۋىنەن تىس ورتاسى. ياعني ادام وسى ءۇش ورتانىڭ قايسىسىمەن جاقىن، سول ادامداردىڭ قابىلەتتەرىن، قاسيەتتەرىن بويىنا سىڭىرەدى، سايكەسىنشە سونداي ادام بولىپ قالىپتاسادى" دەدى ول.
ءىس-شارا سوڭىندا كەلگەندەرگە ارنايى اقپاراتتالعان، جۇمىسسىز جاستار بازاسىنا تىركەلۋ QR كودى بەلگىلەنگەن بروشيۋرالار ۇلەستىرىلدى.
