ماڭعىستاۋ وبلىسىندا اسكەرگە كەتىپ، ۇيىنە تابىتپەن ورالعان ساربازدىڭ دەنەسى جەر قوينىنا تاپسىرىلدى. اسكەريلەردىڭ ايتۋىنشا، 19 جاستاعى ەدىل تەشەباەۆ وتباسىنداعى تۇرمىستىق جاعدايعا توزە الماي، وزىنە قول سالعان. بۇل مالىمدەمەنى مارقۇمنىڭ تۋىستارى جوققا شىعاردى، دەپ حابارلايدى «ادىرنا» ءتىلشىسى «كتك»-عا سىلتەمە جاساپ.
«ءۇش ادامعا ءۇش ءتۇرلى پىكىر ايتىلىپ وتىر. ءبىرىنشى پىشاقتادى دەپ ايتادى، ارتىنشا باتەڭكەنىڭ باۋىنا اسىلىپ قالدى دەيدى. ەندى كەپ اناسىنا ەكى بەلدىكتى بايلاپ اسىلىپ قالدى دەيدى. پودپولكوۆنيك ايتقان»،– دەپ ءتۇسىندىردى ساربازدىڭ اناسى.
جاس جىگىت جاقىندارىنان ۇزدىكسىز اقشا سۇراۋمەن بولىپتى.
«بىرەۋدەن بەس مىڭ سۇراعان ەكەن. ول اقشانىڭ ءبارىن نەعىلا بەرەدى دەدىم. سول كەزدە 5 مىڭدى اتاڭا نالەت دەپ سالىپ جىبەرۋىم كەرەك ەدى. ويلامادىم عوي، مۇنداي بولادى دەپ، دەمەك بالامنان اقشا سۇراعان. اقشا بەرمەگەننەن كەيىن ۇرىپ ولتىرگەن دە. باسقا نەسى بار. اسىلىپ قالدى دەيدى، بالام مەنىڭ اسىلماعان. كوزىم جەتەدى وعان. بۇلار ءولتىرىپ الىپ، سودان كەيىن جالا جاۋىپ وتىر»،– دەدى مارقۇمنىڭ اكەسى.
«جالا جابىلدى» دەگەندى ەدىلدىڭ دوستارى دا ايتادى. سەبەبى، توعىز ايدان بەرى اسكەردە جۇرگەن سارباز ولەر الدىندا ءۇش بىردەي حات جازىپ، وزىنە قول سالۋىنا ۇيىندەگى تۇرمىستىق تاپشىلىق سەبەپ بولعانىن ايتقان. بىراق مارقۇمنىڭ سىنىپتاستارى حاتتارداعى قولتاڭبا «ەدىلدىكى ەمەس» دەپ وتىر.
«ءار حاتتا ءارتۇرلى جازىلعان. ماعان جازىلعان حاتتا باسقاشا جازىلعان، ماماسىنا جازىلعان حاتىندا جازۋى مۇلدەم باسقاشا. ەكەۋىن ەكى ادام جازعان. ونىڭ جازۋى ءسال ناشارلاۋ ەدى. ءتىپتى داپتەرگە جازعاندا ءالفاۆيتتىڭ اراسىندا «ى»، «ءى» دەگەن ءارىپتى جازباي تاستاپ كەتەتىن. ال بۇل جەردە «ى»، «ءى» ارىپتەر بىلاي تۇرسىن، ءۇتىر-نۇكتەگە دەيىن مانەرلەپ جازىلعان»،– دەيدى ەدىلدىڭ دوستارى.
قازىر اسكەري تەرگەۋ باسقارماسى شەكاراشىنىڭ ءولىمى بويىنشا قىلمىستىق ءىس قوزعاپ، ارنايى تەكسەرۋدى باستادى. بىراق بۇل تۋرالى نە قورعانىس مينيسترلىگى، نە شەكارا قىزمەتىندەگىلەر رەسمي اقپارات بەرگەن جوق. ال بالا كۇننەن اسكەري بولۋدى ارمانداپ، 19 جاسىندا اسكەردەن تابىتپەن ورالعان ەدىل تەشەباەۆتىڭ دەنەسى بۇگىن تۋعان جەرى سارىاعاشتا جەرلەندى.
