Mańǵystaý oblysynda áskerge ketip, úıine tabytpen oralǵan sarbazdyń denesi jer qoınyna tapsyryldy. Áskerılerdiń aıtýynsha, 19 jastaǵy Edil Teshebaev otbasyndaǵy turmystyq jaǵdaıǵa tóze almaı, ózine qol salǵan. Bul málimdemeni marqumnyń týystary joqqa shyǵardy, dep habarlaıdy «Adyrna» tilshisi «KTK»-ǵa silteme jasap.
«Úsh adamǵa úsh túrli pikir aıtylyp otyr. Birinshi pyshaqtady dep aıtady, artynsha báteńkeniń baýyna asylyp qaldy deıdi. Endi kep anasyna eki beldikti baılap asylyp qaldy deıdi. Podpolkovnık aıtqan»,– dep túsindirdi sarbazdyń anasy.
Jas jigit jaqyndarynan úzdiksiz aqsha suraýmen bolypty.
«Bireýden bes myń suraǵan eken. Ol aqshanyń bárin neǵyla beredi dedim. Sol kezde 5 myńdy atańa nálet dep salyp jiberýim kerek edi. Oılamadym ǵoı, mundaı bolady dep, demek balamnan aqsha suraǵan. Aqsha bermegennen keıin uryp óltirgen de. Basqa nesi bar. Asylyp qaldy deıdi, balam meniń asylmaǵan. Kózim jetedi oǵan. Bular óltirip alyp, sodan keıin jala jaýyp otyr»,– dedi marqumnyń ákesi.
«Jala jabyldy» degendi Edildiń dostary da aıtady. Sebebi, toǵyz aıdan beri áskerde júrgen sarbaz óler aldynda úsh birdeı hat jazyp, ózine qol salýyna úıindegi turmystyq tapshylyq sebep bolǵanyn aıtqan. Biraq marqumnyń synyptastary hattardaǵy qoltańba «Edildiki emes» dep otyr.
«Ár hatta ártúrli jazylǵan. Maǵan jazylǵan hatta basqasha jazylǵan, mamasyna jazylǵan hatynda jazýy múldem basqasha. Ekeýin eki adam jazǵan. Onyń jazýy sál nasharlaý edi. Tipti dápterge jazǵanda alfavıttiń arasynda «y», «i» degen áripti jazbaı tastap ketetin. Al bul jerde «y», «i» áripter bylaı tursyn, útir-núktege deıin mánerlep jazylǵan»,– deıdi Edildiń dostary.
Qazir áskerı tergeý basqarmasy shekarashynyń ólimi boıynsha qylmystyq is qozǵap, arnaıy tekserýdi bastady. Biraq bul týraly ne qorǵanys mınıstrligi, ne shekara qyzmetindegiler resmı aqparat bergen joq. Al bala kúnnen áskerı bolýdy armandap, 19 jasynda áskerden tabytpen oralǵan Edil Teshebaevtyń denesi búgin týǵan jeri Saryaǵashta jerlendi.
