Sońǵy jyldary elimizde úlken tennıs qarqyndy damyp keledi. Saıypqyrandarymyz halyqaralyq jarystarda olja salyp júr. Solardyń biri – 14 jasqa deıingi Qazaqstannyń №1 raketkasy Zańǵar Nurlanuly. Jas ta bolsa talantymen talaıdy tańǵaldyryp júrgen sportshyny Túrkistan oblysynyń ákimi Ómirzaq Shókeev arnaıy qabyldap, pikir almasty. Bul týraly Túrkistan oblysy ákiminiń baspasóz qyzmeti málimdedi, dep habarlaıdy “Adyrna” ulttyq portaly.
“ Zańǵar balamyzdan úmitimiz zor. Kezdesýdi jón kórdim. Jap-jas bolsa da, 13-14 jasynda eldiń atyn shyǵaryp jatyr. Túrkistan oblysy úshin osyndaı talanttardyń orny bólek. Eýropada atoı salyp júrsiń. Túrkistandyq balalardy sen arqyly jigerlendirip, úlkenn tennıske qyzyqtyrý úshin arnaıy shaqyryp otyrmyz”, – dedi Ómirzaq Shókeev.
Úlken tennısten 14 jasqa deıingi sportshylar arasyndaǵy Qazaqstannyń birinshi raketkasy Zańǵar Nurlanuly Slovakııada ótken Tennis Europe serııasynyń Baseline Open U14 ekinshi sanatty týrnıriniń chempıony atanǵan. Ol fınalda eki jarym saǵatqa sozylǵan dramalyq básekede Slovenııanyń 14 jasqa deıingi birinshi raketkasy Zıgo Seshkony 3:6, 6:2, 7:6 esebimen jeńdi. Túrkistan oblysynyń sportshysy qazir Eýropa reıtınginde úzdikter qatarynda tur. Vengrııa, Franııa jáne ózge de memleketterdegi dodalarda jeńiske jetken.
“Armanym Qazaqstannyń Týyn jelbiretip, elimdi álemge tanytý. Ol úshin kóp jumys isteý, jattyǵý kerek, – degen Zańǵar Nurlanuly arnaıy qabyldap, qurmet kórsetken óńir basshysyna rızashylyǵyn bildirdi.
Búgin Túrkistanda halyqaralyq tennıs ortalyǵynyń tehnıkalyq ashylýy ótti. Munda úlken tennıspen shuǵyldanýǵa barlyq jaǵdaı jasalǵan.
”Adyrna” ulttyq portaly
