قازاقستاندىق سپورتشى رۋسلان قۇربانوۆ استانادا وتكەن سەمسەرلەسۋدەن (شپاگا) الەم كۋبوگىندا كۇمىس جۇلدەگەر اتاندى. بۇل مەدال قازاقستان ءۇشىن اتالعان تۋرنيردەگى العاشقى جۇلدە بولدى، دەپ حابارلايدى "ادىرنا".
شەشۋشى كەزدەسۋدە قازاقستاندىق شپاگاشى ۋكراينا قۇراماسىنىڭ وكىلى رومان سۆيچكارعا جول بەردى. فينال 15:12 ەسەبىمەن سۆيچكاردىڭ پايداسىنا اياقتالدى. وسىلايشا، رۋسلان قۇربانوۆ جارىستى ەكىنشى ورىنمەن اياقتادى. ونىڭ كۇمىس جۇلدەسى قازاقستان ءۇشىن بۇل تۋرنيردەگى العاشقى مەدال بولدى.
ايتا كەتەيىك، بۇعان دەيىن قۇربانوۆ گەرمانيانىڭ حايدەنحايم قالاسىندا وتكەن الەم كۋبوگىندا جەڭىمپاز اتانعان ەدى.
استانادا 26 ناۋرىزدا ەرلەر مەن ايەلدەر اراسىندا سەمسەرلەسۋدەن (شپاگا) الەم كۋبوگى باستالدى. بۇل – حالىقارالىق سەمسەرلەسۋ فەدەراتسياسىنىڭ (FIE) قولداۋىمەن وتەتىن ماڭىزدى تۋرنيرلەردىڭ ءبىرى. قازاقستان مۇنداي دەڭگەيدەگى جارىستى العاش رەت قابىلداپ وتىر.
FIE حالىقارالىق كۇنتىزبەسىنە جىل سايىن وسى ساناتتاعى بار بولعانى بەس تۋرنير ەنەدى. ولار ءداستۇرلى تۇردە شۆەيتساريادا، گەرمانيادا، ءباا-دە جانە كانادادا وتەدى. بيىل وسى قاتارعا العاش رەت قازاقستان قوسىلىپ، ورتالىق ازيادا الەم كۋبوگىن قابىلداعان العاشقى ەل اتاندى.
جارىس 26–29 ناۋرىز ارالىعىندا وتەدى. تۋرنيرگە الەمنىڭ 46 ەلىنەن شامامەن 500 سپورتشى قاتىسىپ جاتىر، ونىڭ ىشىندە 222 ايەل جانە 272 ەر ادام بار. كوماندالىق سايىستا 31 ەرلەر جانە 23 ايەلدەر قۇراماسى باق سىنايدى. جاتتىقتىرۋشىلار، تورەشىلەر جانە ۇيىمداستىرۋشىلاردى قوسقاندا، قاتىسۋشىلاردىڭ جالپى سانى 1000 ادامنان اسادى.
