Nursultan qalasy janyndaǵy №68665 áskerı bólimshesinde Arman A. esimdi kapıtan sheninde vzvod komandıri 2022 jyly 26 aqpanda ol ǵımarat ishinde qarýynan atyp, oǵymen áriptesin jaralaǵan. Oqıǵa syrtqa jaıylmaı, bólim ishinde rettelip, "jabýly qazan" kúıinde qalǵan kórinedi. Sodan beri qylmystyq is, tergeý júrgen. Biraq is sotqa deıin jetpedi, dep habarlaıdy “Adyrna” ulttyq portaly inbusiness.kz saıtyna siltep.
Tergeý kezinde áskerı qyzmetshi qyzmetinen ýaqytsha alastatylǵan. Tipti, armııa qatarynan múldem qýylýy yqtımal.
Alaıda oqıǵaǵa qatysty ofıerdiń anasy, Nur-Sultan turǵyny, zeınetker Gúlaıym apaı aıtyp berdi. Ol Qorǵanys mınıstrligine hat jazyp, balasyn Qarýly kúshter sapynan qýmaýdy, jumysyn jalǵastyrýǵa, aıybyn adal qyzmetpen óteýge múmkindik berýdi surady.
Onyń áńgimeleýinshe, balasy qarýlasyn ádeıi atpaǵan.
"Sol kúni balam kezekshilikti qabyldap jatqan kezinde qarýy baıqaýsyzda atylyp ketipti. Oq kontraktimen áskerı qyzmette júrgen adamǵa tıgen. Qudaıǵa shúkir, ol adam tiri qaldy, qazir jaǵdaıy jaman emes, em alyp júr. Keshirim berýine baılanysty qylmystyq is toqtatyldy. Meniń balam áskerı qyzmetti 14 jyl atqardy. Osyǵan deıin eshqandaı sógis, eskertý alǵan emes. Bıylǵy qańtar oqıǵalary kezinde 12 kún boıy úı kórmeı, Qaraǵandy blokpostynda komandırlik qyzmetin kirshiksiz atqardy, elordany qorǵaýǵa qol astyndaǵy adamdardy jumyldyra bildi", – deıdi anasy.
Sondaı-aq ol ulynyń jetistigi retinde byltyrǵy jyly Qaraǵandy, Otar, Aqtaý qalalarynda jarty jyl boıy áskerı tehnıkalardy synaqtan ótkizýge qatysqanyn alǵa tartady.
"Ol óz qyzmetin tek jaqsy meńgerip qana qoımaı, ony jaqsy kóredi. Qazirgi kúrdeli kezeńde elimizge daıyn ofıerler aýadaı qajet emes pe? Meniń balam áli de óz tájirıbesimen, eńbegimen eline adal qyzmet ete alady. Otandy qorǵaýǵa, qorǵanysty arttyrýǵa úles qosa alady", – deıdi Gúlaıym.
Kapıtannyń otbasynda kámiletke tolmaǵan 3 balasy bar kórinedi. Gúlaıym eki nemeresiniń bala kúninen múgedek ekenin jetkizdi.
Al áskerı qyzmet qarjylyq qoldaý syrtynda, áleýmettik jeńildikter beretini belgili. Endi onyń bárinen aıyrylyp qalmaq.
Onyń ústine Arman 2018 jyly Qorǵanys mınıstrliginiń baǵdarlamasy aıasynda "Otbasy bankinen" ıpotekaǵa páter alypty.
Anasy "sol baspananyń aı saıynǵy nesıesin tóleýdiń ózi úlken problema bolaıyn dep tur" deıdi.
"Nemerelerimniń múgedektigi úshin alatyn járdemaqylary nesıeni óteýge ketip qala ma dep qorqamyn. Onda nemerelerim em-domsyz qalmaı ma? Sóıtip, onyń otbasy kúızeliske túsip ketýi múmkin. Sonda ne bolady, bilmeımin. Balam tek osy qyzmetin biledi. Sondyqtan Qorǵanys mınıstrliginen balamdy áskerı qyzmetten bosatpaýdy suraımyn. Eger elordadaǵy áskerı qyzmette qaldyra almaımyz dep Qazaqstannyń basqa túkpirine jer aýdaryp jiberse de, shydaýǵa daıyn. Tek qyzmetinen bosatpasa boldy", – dep jalynady óz hatynda Gúlaıym apaı.
Qorǵanys mınıstrligi ázirge bul ótinishti qarastyrýda.
"Qazirgi ýaqytta ol kisiniń máselesi qaralyp jatyr. Qorytyndysy boıynsha Qazaqstan zańnamasymen bekitilgen tártippen naqty jaýap beriletin bolady", – dep qysqa qaıyrdy vedomstvo.
Jalpy, Qazaqstan Qarýly kúshterinde tótenshe oqıǵalar jıilep ketkeni jasyryn emes. Sondyqtan keshe Prezıdent Qasym-Jomart Toqaev Qazaqstan armııasyndaǵy áskerı qyzmetshiler arasynda ólim-jitimniń jıileýine erekshe nazar aýdarǵany málim boldy. Aqorda osyǵan baılanysty komıssııa qurylatynyn jarııa etti.
Áskerı shendiler oqıǵalardy qoǵamnan jasyrýǵa tyrysady, endeshe tekserýdi solardyń enshisinde qaldyrsa, ádildik bolmaýy múmkin. Sol sebepti Memleket basshysy álgi komıssııanyń basshylyq tizginin Qorǵanys mınıstrine ne áskerı polıııaǵa emes, óziniń kómekshisi – Qaýipsizdik keńesiniń hatshysy Ǵızat Nurdáýletovke senip tapsyrdy.
Alda arnaıy komıssııa sonyń jetekshiligimen armııamyzdaǵy keleńsizdikterdiń sebebin tergep-tekserýge, áskerı qyzmetshiler arasyndaǵy zańsyzdyqtardy joıý jáne keleshekte áskerdegi mundaı teris is-áreketterdiń qaıtalanbaýy úshin oǵan tosqaýyl qoıý sharalaryn ázirleýge jaýapty bolady.
”Adyrna” ulttyq portaly
