بۇگىن قىرعىزستان استاناسى بىشكەك قالاسىندا حالىقارالىق تۇركى اكادەمياسىنىڭ ۇيىتقى بولۋىمەن تۇركى الەمى ۇلتتىق عىلىم اكادەميالارى وداعى (تاۇعاو) پرەزيديۋمىنىڭ 6-ءشى وتىرىسى ءوتتى.
القالى جيىنعا حالىقارالىق تۇركى اكادەمياسىنىڭ پرەزيدەنتى دارحان قىدىرالى، قىرعىز رەسپۋبليكاسىنىڭ ۇلتتىق عىلىم اكادەمياسىنىڭ پرەزيدەنتى مۋرات دجۋماتاەۆ، ازەربايجان ۇلتتىق عىلىم اكادەمياسىنىڭ ءى ۆيتسە-پرەزيدەنتى يسا گابيببەيلي، وزبەكستان عىلىم اكادەمياسىنىڭ ۆيتسە-پرەزيدەنتى باحروم ابدۋحاليموۆ، تاتارستان عىلىم اكادەمياسىنىڭ پرەزيدەنتى مياكزيۋم سالاحوۆ، قىرعىزستان عىلىم اكادەمياسىنىڭ پرەزيدۋم مۇشەلەرى مەن بەلگىلى عالىمدار قاتىستى.
وسى ورايدا وتىرىسقا وزبەكستاننىڭ تمۇ مۇشەسى رەتىندە قاتىسىپ وتىرعانىن ايتا كەتۋ كەرەك.
پاندەميادان كەيىن باس قوسىپ وتىرعان وداق مۇشەلەرىنە حالىقارالىق تۇركى اكادەمياسىنىڭ باسشىسى دارحان قىدىرالى ريزاشىلىعىن ءبىلىدىرىپ، كۇن تارتىبىمەن تانىستىردى.
جيىن اياسىندا اكادەميا باسشىسى د. قىدىرالى قىرعىز رەسپۋبليكاسىنىڭ ۇلتتىق عىلىم اكادەمياسىنىڭ پرەزيدەنتى مۋرات دجۋماتاەۆتى جانە تاتارستان عىلىم اكادەمياسىنىڭ پرەزيدەنتى مياكزيۋم سالاحوۆتى تۇركى الەمنىڭ ىنتىماقتىستىعىن ارتتىرۋداعى ۇلەسى ءۇشىن تۇركى اكادەمياسىنىڭ التىن مەدالىمەن ماراپاتتادى.
وتىرىستا ءسوز باسىن العان ازەربايجان ۇلتتىق عىلىم اكادەمياسىنىڭ ءى ۆيتسە-پرەزيدەنتى يسا گابيببەيلي تاۇعاو-داعى ءىس باسىنداعى توراعالىقتى ازەربايجان ۇلتتىق عىلىم اكادەمياسىنان قىرعىزستان عىلىم اكادەمياسىنا تاپسىردى.
ءوز كەزەگىندە توراعىلىقتى قابىلداپ العان ۇلتتىق عىلىم اكادەمياسىنىڭ پرەزيدەنتى مۋرات دجۋماتاەۆ پرەزيديۋم مۇشەلەرىنە ريزاشىلىعىن ءبىلدىرىپ، بىرلەسكەن جوبالاردى جالعاستىراتىنىن ايتتى.
جيىندا تۇركى الەمى ۇلتتىق عىلىم اكادەميالارى وداعىنىڭ باسشىلارى ءوز ۇيىمدارىنىڭ اتقارىپ جاتقان جۇمىستارى مەن الداعى جوسپارلارى تۋرالى بايانداما جاسادى.
سونىمەن قاتار، كەلەلى باسقوسۋدا تۇركى مەملەكەتتەرى مەن رەسپۋبليكالارىندا پاندەميادان كەيىنگى كەزەڭدە قابىلدانعان عىلىمدى قولداۋ جونىندەگى شارالارعا قاتىستى پىكىر الماسىپ، كەلەسى وتىرىستى وتكىزۋ ماسەلەسىن تالقىلادى.
قازان قالاسىنان ارنايى كەلگەن تاتارستان عىلىم اكادەمياسىنىڭ پرەزيدەنتى مياكزيۋم سالاحوۆ ءوزى باسقارىپ وتىرعان ۇيىمنىڭ زەرتتەۋ نەگىزگى زەرتتەۋ باعىتتارىمەن تانىستىردى.
وداققا العاش رەت تمۇ مۇشەسى رەتىندە قاتىسىپ وتىرعان وزبەكستان عىلىم اكادەمياسىنىڭ ۆيتسە-پرەزيدەنتى باحروم ابدۋحاليموۆ عىلىمي ىنتىماقتاستىقتى قولداپ بىرلەسە جۇمىس ىستەۋگە ءازىر ەكەنىن مالىمدەدى.
جيىن سونىندا ارنايى شەشىم قابىلداندى. پرەزيديۋمنىڭ ورتاق شەشىم بويىنشا وداقتىڭ كەلەسى وتىرىسىن تاتارستاندا وتكىزۋگە ۋاعدالاستى.
ايتا كەتۋ كەرەك، تاۇعاو حالىقارالىق تۇركى اكادەمياسىنىڭ باستاماسىمەن 2015 جىلعى 29 ماۋسىمدا استانا (قازىرگى نۇر-سۇلتان) قالاسىندا قۇرىلعان. وسىعان دەيىن تاۇعاو 4 رەت كەزەكتى جيىنى مەن 1 توتەنشە وتىرىسى وتكەن ەدى.
