Búgin Qyrǵyzstan astanasy Bishkek qalasynda Halyqaralyq Túrki akademııasynyń uıytqy bolýymen Túrki álemi Ulttyq ǵylym akademııalary odaǵy (TÁUǴAO) prezıdıýmynyń 6-shi otyrysy ótti.
Alqaly jıynǵa Halyqaralyq Túrki akademııasynyń prezıdenti Darhan Qydyráli, Qyrǵyz Respýblıkasynyń Ulttyq Ǵylym akademııasynyń prezıdenti Mýrat Djýmataev, Ázerbaıjan Ulttyq ǵylym akademııasynyń I vıe-prezıdenti Isa Gabıbbeılı, Ózbekstan Ǵylym akademııasynyń vıe-prezıdenti Bahrom Abdýhalımov, Tatarstan Ǵylym akademııasynyń prezıdenti Mıakzıým Salahov, Qyrǵyzstan ǵylym akademııasynyń prezıdým músheleri men belgili ǵalymdar qatysty.
Osy oraıda otyrysqa Ózbekstannyń TMU múshesi retinde qatysyp otyrǵanyn aıta ketý kerek.
Pandemııadan keıin bas qosyp otyrǵan Odaq múshelerine Halyqaralyq Túrki akademııasynyń basshysy Darhan Qydyráli rızashylyǵyn bilidirip, kún tártibimen tanystyrdy.
Jıyn aıasynda Akademııa basshysy D. Qydyráli Qyrǵyz Respýblıkasynyń Ulttyq Ǵylym akademııasynyń prezıdenti Mýrat Djýmataevty jáne Tatarstan Ǵylym akademııasynyń prezıdenti Mıakzıým Salahovty Túrki álemniń yntymaqtystyǵyn arttyrýdaǵy úlesi úshin Túrki akademııasynyń Altyn medalimen marapattady.
Otyrysta sóz basyn alǵan Ázerbaıjan Ulttyq ǵylym akademııasynyń I vıe-prezıdenti Isa Gabıbbeılı TÁUǴAO-daǵy is basyndaǵy tóraǵalyqty Ázerbaıjan Ulttyq Ǵylym Akademııasynan Qyrǵyzstan Ǵylym Akademııasyna tapsyrdy.
Óz kezeginde tóraǵylyqty qabyldap alǵan Ulttyq Ǵylym akademııasynyń prezıdenti Mýrat Djýmataev prezıdıým múshelerine rızashylyǵyn bildirip, birlesken jobalardy jalǵastyratynyn aıtty.
Jıynda Túrki álemi Ulttyq ǵylym akademııalary odaǵynyń basshylary óz uıymdarynyń atqaryp jatqan jumystary men aldaǵy josparlary týraly baıandama jasady.
Sonymen qatar, keleli basqosýda túrki memleketteri men respýblıkalarynda pandemııadan keıingi kezeńde qabyldanǵan ǵylymdy qoldaý jónindegi sharalarǵa qatysty pikir almasyp, kelesi otyrysty ótkizý máselesin talqylady.
Qazan qalasynan arnaıy kelgen Tatarstan Ǵylym akademııasynyń prezıdenti Mıakzıým Salahov ózi basqaryp otyrǵan uıymnyń zertteý negizgi zertteý baǵyttarymen tanystyrdy.
Odaqqa alǵash ret TMU múshesi retinde qatysyp otyrǵan Ózbekstan Ǵylym akademııasynyń vıe-prezıdenti Bahrom Abdýhalımov ǵylymı yntymaqtastyqty qoldap birlese jumys isteýge ázir ekenin málimdedi.
Jıyn sonynda arnaıy sheshim qabyldandy. Prezıdıýmnyń ortaq sheshim boıynsha Odaqtyń kelesi otyrysyn Tatarstanda ótkizýge ýaǵdalasty.
Aıta ketý kerek, TÁUǴAO Halyqaralyq Túrki akademııasynyń bastamasymen 2015 jylǵy 29 maýsymda Astana (qazirgi Nur-Sultan) qalasynda qurylǵan. Osyǵan deıin TÁUǴAO 4 ret kezekti jıyny men 1 tótenshe otyrysy ótken edi.
