اسحات ايماعامبەتوۆ Tik Tok كومپانياسىنىڭ وكىلدەرىمەن كەزدەسىپ، تىك توك-تا ءبىلىم مەن عىلىمدى قازاق تىلىندە ناسيحاتتاۋدى تالقىلادى. بۇل تۋرالى بعم ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
الەمدەگى ەڭ ءىرى ينتەرنەت-پلاتفورمانىڭ وكىلدەرى ءبىلىم جانە عىلىم مينيسترلىگىمەن ىنتىماقتاستىقتىڭ تيىمدىلىگىن اتاپ ءوتتى. بۇعان دەيىن مينيسترلىك Tik Tok-تا پاراقشا اشىپ، تاراپتار #تيكتوكتاۇيرەنقازاقستان بىرلەسكەن ءبىلىم بەرۋ جوباسىن باستاعان بولاتىن. مۇندا پايدالانۋشىلار ءارتۇرلى اقپاراتپەن بولىسەدى.
Tik Tok وكىلدەرىنىڭ ايتۋىنشا، ءبىلىم بەرۋ باستاماسى بار قازاقستاندىق سەگمەنت 10 ملن رەت قارالعان، سەبەبى ۆيدەولار ەڭ تانىمال بولىمدەردە كورسەتىلگەن. شىعىس ەۋروپا مەن رەسەيدەن كەلگەن قوناقتار بولاشاقتا #تيكتوكتاعىمۇعالىمدەر جانە ت.ب جوبالاردى ىسكە قوسۋدى ۇسىندى.
ء"بىز باسقا ەلدەردىڭ مينيسترلىكتەرىمەن بىرلەسە جۇمىس ىستەيمىز. ءبىلىم جانە عىلىم مينيسترلىگىنىڭ اشىقتىعى، مينيسترلىكتىڭ جۇمىسىن كورسەتۋگە، اۋديتوريانى ءبىلىم بەرۋ جوبالارىنا تارتۋعا دايىندىعى قۋانتادى. ونىڭ ءبىرىنشىسى – #تيكتوكتاۇيرەنقازاقستان. قازىردىڭ وزىندە قىزىعۋشىلىق تانىتىپ، كوپ قارالىم جيناپ ۇلگەردى. مينيسترلىكتىڭ TikTok پاراقشاسىنداعى وقىرماندار سانى ءۇش ەسەگە ارتتى. سونداي-اق قازاقستاندىق ۋنيۆەرسيتەتپەن تىكەلەي بايلانىس ورناتىپ، باسقا ەلدەردەن كەلگەن ستۋدەنتتەر وتاندىق ۋنيۆەرسيتەتتىڭ ۇسىنىستارىمەن تانىستى. مينيسترلىكپەن بىرلەسكەن جۇمىسىمىزدى جالعاستىرامىز دەپ ۇمىتتەنەمىن", – دەدى شىعىس ەۋروپاداعى ۇكىمەتتىك بايلانىس جانە كورپوراتيۆتىك ىستەر جونىندەگى ديرەكتور سەرگەي سوكولوۆ.
ءوز كەزەگىندە ءبىلىم جانە عىلىم ءمينيسترى جاڭا ينتەرنەت-سايتتاردا ءبىلىم مەن عىلىمدى ناسيحاتتاۋدىڭ ماڭىزدىلىعىنا توقتالدى. ول قازاقستاندا قازىردىڭ وزىندە ءتۇرلى ينتەرنەت-پلاتفورمالاردى قولداناتىن، ءتۇرلى ساباقتاردى زاماناۋي جانە قىزىقتى فورماتتا تۇسىندىرەتىن بەلسەندى مۇعالىمدەردىڭ بار ەكەنىن اتاپ ءوتتى. بۇل ءادىس، اسىرەسە، پاندەميا كەزىندە ماڭىزدى بولدى.
ء"بىز ءۇشىن مەملەكەتتىك تىلدە ءبىلىم بەرۋ جانە عىلىمي مازمۇندى قۇرۋعا باسىمدىق بەرىلەدى. ءبىزدىڭ ىنتىماقتاستىعىمىز قازاق ءتىلىن جانە Tik Tok پلاتفورماسىندا مەملەكەتتىك تىلدەگى عىلىمي-تانىمدىق اقپاراتتى دامىتۋ تانىمال بولادى دەپ سەنەمىن. بۇل ءسىز وسى پلاتفورمادا وقۋعا بولادى دەگەندى بىلدىرمەيدى، بىراق ءبىلىم بەرۋ ماقساتىندا رەسۋرستاردى قوسىمشا اقپارات كوزى رەتىندە ىسكە اسىرۋ پايدالى بولار ەدى. جاقىندا مەن تۇلەكتەرمەن سويلەستىم، ولار وقۋلىقتار مەن باسقا دا ءبىلىم بەرۋ رەسۋرستارىن پايدالانا وتىرىپ دايىندالىپ جاتقانىن، سونىمەن قاتار ۇبت-عا دايىندالا باستاعانىن، سونىڭ ىشىندە Tik Tok-تان اقپارات الاتىنىن ايتتى.
مەن ءوزىم الەۋمەتتىك جەلىلەردىڭ وتە بەلسەندى قولدانۋشىسى رەتىندە اقپاراتتى جەتكىزۋ ءۇشىن ءارتۇرلى قۇرالداردى پايدالانۋ قانشالىقتى ماڭىزدى ەكەنىن تۇسىنەمىن. مىسالى، مەن Instagram, Facebook, Twitter-دەگى پاراقشالارىمدى جۇرگىزەمىن، سونىمەن قاتار جاقىندا Telegram-دا پاراقشا اشتىم. بۇل اقپاراتتى جىلدام جەتكىزۋگە ىڭعايلى", – دەدى ءبىلىم جانە عىلىم ءمينيسترى اسحات ايماعامبەتوۆ.
قورىتىندىلاي كەلە، Tik Tok كومانداسىنىڭ وكىلدەرى اقپاراتتى كرەاتيۆتى جانە ەرەكشە ۇسىناتىن ينتەرنەت-پلاتفورمانىڭ الگوريتمدەرى مەن ەرەكشەلىكتەرى تۋرالى ايتتى.
”ادىرنا” ۇلتتىق پورتالى
