مەملەكەت باسشىسى قاسىم-جومارت توقاەۆ «قازاقستان رەسپۋبليكاسى پرەزيدەنتىنىڭ جانىنداعى عىلىم جانە تەحنولوگيالار جونىندەگى ۇلتتىق كەڭەستى قۇرۋ تۋرالى» جارلىققا قول قويدى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەڭەستىڭ قۇرىلۋى ۇلتتىق عىلىمي جۇيەنى باسقارۋ ءىسىن جەتىلدىرۋگە جانە قازاقستان رەسپۋبليكاسىنىڭ عىلىم جانە عىلىمي-تەحنيكالىق قىزمەت سالاسىنداعى مەملەكەتتىك ساياساتتى ودان ءارى دامىتۋدىڭ باسىم باعىتتارىن ايقىنداۋ بويىنشا ۇسىنىمدار ازىرلەۋگە ىقپال ەتەدى.
قازاقستان رەسپۋبليكاسى پرەزيدەنتىنىڭ جانىنداعى عىلىم جانە تەحنولوگيالار جونىندەگى ۇلتتىق كەڭەستىڭ قۇرامى مەن ەرەجەسى وسى جارلىقپەن بەكىتىلدى. كەڭەس قۇرامىنا حالىقارالىق دەڭگەيدە تانىلعان، عىلىمي-زەرتتەۋ بەلسەندىلىگى جوعارى، عىلىمنىڭ باسىم باعىتتارىندا ەڭبەك ەتەتىن اكادەميكتەر مەن عالىمدار ەندى.
سونداي-اق كەڭەس قۇرامىنا بەركلي كوسمولوگيالىق فيزيكا ورتالىعىنىڭ فيزيكا جانە استروفيزيكا پروفەسسورى، نوبەل سىيلىعىنىڭ لاۋرەاتى دجوردج فيتسدجەرالد سمۋت III (اقش), سونداي-اق الەمنىڭ جەتەكشى عىلىمي ورتالىقتارىندا عىلىمي-زەرتتەۋ جۇمىستارىمەن اينالىساتىن بىرقاتار وتانداسىمىز كىردى.
سونىمەن قاتار عىلىمي، عىلىمي-تەحنولوگيالىق جانە يننوۆاتسيالىق ساياساتتى جۇزەگە اسىرۋعا جاۋاپتى ۇكىمەت مۇشەلەرى كەڭەس قۇرامىنا ەندى.
وتاندىق جانە شەتەلدىك جەتەكشى عالىمداردىڭ ۇلتتىق كەڭەسكە مۇشە بولۋى قازاقستان عىلىمىن دامىتۋدا پەرسپەكتيۆتى جانە ستراتەگيالىق ماڭىزدى شەشىمدەر قابىلداۋعا وڭ سەپتىگىن تيگىزەدى.
