قىرعىزستانداعى بالاباقشا تاربيەلەنۋشىلەرى قاسيەتتى قاعبانىڭ ماكەتىن اينالدى، دەپ حابارلايدى "ادىرنا" ۇلتتىق پورتالى "24.kg" سايتىنا سىلتەمە جاساپ.
قىرعىزستان رەسپۋبليكانىڭ ءبىلىم جانە عىلىم مينيسترلىگى وسى بەينەجازباعا بايلانىستى قۇقىق قورعاۋ قىزمەتكەرلەرىنە جۇگىندى.
الەۋمەتتىك جەلىلەردە قاسيەتتى قاعبانىڭ ماكەتىن اينالىپ ءوتىپ، كاليمانى (يسلامعا سەنىم ءبىلدىرۋ) قايتالاپ جاتقان بالالاردىڭ ۆيدەوسى پايدا بولدى.
ءبىلىم جانە عىلىم مينيسترلىگى بۇل بەينەجازبا "سۋمايا ايداركەن" مەكتەپكە دەيىنگى مەكەمەسىندە 30 مامىردا تۇسىرىلگەنىن اتاپ ءوتتى. مەكەمە ءبىلىم بەرۋ قىزمەتىن جۇرگىزۋ قۇقىعىنسىز، ياعني، ليتسەنزياسىز جۇمىس ىستەيدى.
"كامەلەتكە تولماعان بالالارعا قاتىستى قۇقىق بۇزۋشىلىققا (بەلگىلى ءبىر ءدىننىڭ مادەنيەتىن بالالارعا ماجبۇرلەۋ) جول بەرگەن اكىمشىلىك پەن بالاباقشا تاربيەشىلەرىنىڭ جاۋاپكەرشىلىگى تۋرالى ماسەلە زاڭنامادا بەلگىلەنگەن تارتىپپەن قارالاتىن بولادى", - دەپ اتاپ ءوتتى ءبىلىم مينيسترلىگى.
"ادىرنا" ۇلتتىق پورتالى
