شىمكەنتتە بالالار كۇنى اياسىندا ءتۇرلى ءىس-شارالار ۇيىمداستىرىلدى. بەس ءجۇز وقۋشى ءال-فارابي الاڭىنداعى اللەيادا اسفالتكە سۋرەت سالدى. ال قولونەرمەن اينالىساتىن وقۋشىلار كورمە وتكىزدى.
شىمكەنت قالاسىنىڭ اكىمى مۇرات ايتەنوۆ بالالاردىڭ شىعارماشىلىعىمەن تانىسىپ، رەسپۋبليكالىق، حالىقارالىق بايقاۋلار مەن وليمپيادا جەڭىمپازدارىن قۇتتىقتادى. سونداي-اق «بارلىعى بالالار ءۇشىن» تاقىرىبىندا بالا داعدىسىن، شىعارماشىلىعىن دامىتۋعا باعىتتالعان ادىستەمەلىك كورمە ۇيىمداستىرىلىپ، وندا بالالاردى دامىتۋ باعدارلامالارى تانىستىرىلدى.
— بالالاردى بۇگىنگى ەرەكشە مەرەكە، 1 ماۋسىم – حالىقارالىق بالالاردى قورعاۋ كۇنىمەن شىن جۇرەكتەن قۇتتىقتايمىن! مەملەكەت باسشىسى قاسىم-جومارت كەمەلۇلى 2022 جىلدى بالالار جىلى دەپ جاريالادى. بيىل شىمكەنتتە وسى ماقساتتا 84 تارماقتان تۇراتىن ارنايى ءىس-شارالار جوسپارى بەكىتىلدى. بيىلدان باستاپ شىمكەنتتە باستاۋىش سىنىپتا وقيتىن بارلىق وقۋشى ءبىر رەتتىك تەگىن ىستىق تاماقپەن قامتىلدى. بالالاردىڭ بوس ۋاقىتىن ءتيىمدى ۇيىمداستىرۋدا جان باسىنا قارجىلاندىرۋ جۇيەسى ەنگىزىلىپ، بالالارىمىز تەگىن ۇيىرمەلەر مەن سپورتتىق سەكتسيالارعا قاتىسىپ ءجۇر. 2021-2022 وقۋ جىلىندا قالامىزدىڭ 500-دەن استام وقۋشىسى رەسپۋبليكالىق، حالىقارالىق دەڭگەيدەگى ءتۇرلى سايىستاردا توپ جاردى. بۇل ءبىز ءۇشىن ماقتانىش. بۇل – ەڭ الدىمەن ۇلاعاتتى ۇستازداردىڭ ەرەن ەڭبەگىنىڭ جەمىسى. سونداي-اق، وقۋشىلاردىڭ دامىلسىز ءبىلىم الىپ، وقىپ-ۇيرەنۋگە جۇمساعان التىن ۋاقىتىنىڭ قايتارىمى دەپ بىلەمىن، - دەدى قالا اكىمى مۇرات دۇيسەنبەكۇلى.
جيىن بارىسىندا حالىقارالىق، رەسپۋبليكالىق ءپان وليمپياداسىنىڭ جانە ونەر بايقاۋلارىنىڭ جەڭىمپازدارى ماراپاتتالىپ، ولارعا جازعى ساۋىقتىرۋ لاگەرلەرىنە جولداما بەرىلدى. سالتاناتتى شارا كونتسەرتكە ۇلاسىپ، بالاباقشا بۇلدىرشىندەرى مەن مەكتەپ وقۋشىلارى ونەرلەرىن پاش ەتتى. كونتسەرتتى قر ەڭبەك سىڭىرگەن قايراتكەرى مايرا مۇحامەدقىزى باستاعان قالالىق وپەرا جانە بالەت تەاترىنىڭ سوليستەرى قورىتىندىلادى.
"ادىرنا" ۇلتتىق پورتالى
