سمايىلوۆ ماسكەۋدە ميحايل ميشۋستينمەن كەلىسسوز جۇرگىزدى

2407
Adyrna.kz Telegram

ءاليحان سمايىلوۆ ماسكەۋگە جۇمىس ساپارى بارىسىندا رەسەي فەدەراتسياسى ۇكىمەتىنىڭ توراعاسى ميحايل ميشۋستينمەن كەلىسسوز جۇرگىزدى. بۇل تۋرالى پرەمەر-ءمينيستردىڭ رەسمي اقپاراتتىق رەسۋرسى جازدى، دەپ حابارلايدى «ادىرنا» ءتىلشىسى.

كەڭەيتىلگەن قۇرامدا وتكەن كەزدەسۋ بارىسىندا ءاليحان سمايىلوۆ قازاقستان مەن رەسەي مەملەكەتارالىق بايلانىستىڭ بارلىق سپەكترى بويىنشا ەكىجاقتى ءوزارا ءىس-قيمىلدىڭ ءداستۇرلى جوعارى دەڭگەيىنە يە ەكەنىن اتاپ ءوتتى.

بيىل ەكى مەملەكەت اراسىنداعى ديپلوماتيالىق قاتىناستاردىڭ ورناعانىنا جانە دوستىق، ىنتىماقتاستىق جانە ءوزارا كومەك تۋرالى شارتتىڭ بەكىتىلگەنىنە 30 جىل تولادى.

«وسى كەزەڭدە سەنىمدى ءارى سىندارلى ديالوگ ورنادى. كوپتەگەن ءوزارا ءتيىمدى باعىتتار بويىنشا سەرىكتەستىك جوعارى دەڭگەيگە كوتەرىلدى»، — دەدى ءاليحان سمايىلوۆ.

سونىمەن قاتار قر ۇكىمەتىنىڭ باسشىسى ەكىجاقتى قارىم-قاتىناستى ودان ءارى دامىتۋ ءۇشىن ۇقشۇ-عا مۇشە مەملەكەتتەر باسشىلارىنىڭ مەرەيتويلىق وتىرىسى اياسىندا قازاقستان مەن رەسەي پرەزيدەنتتەرىنىڭ جاقىندا وتكەن كەزدەسۋى بارىسىندا ماڭىزدى باعدارلاردىڭ بەلگىلەنگەنىن جەتكىزدى.

رەسەي فەدەراتسياسى – قازاقستاننىڭ نەگىزگى ساۋدا-ەكونوميكالىق سەرىكتەسى. 2021 جىلدىڭ قورىتىندىسى بويىنشا ءوزارا تاۋار اينالىمى ۇشتەن بىرگە ءوسىپ، $24,2 ملرد رەكوردتىق كورسەتكىشكە جەتتى.

وسىعان وراي، ءاليحان سمايىلوۆ ەكى ەل ۇكىمەتتەرى الدىندا ءوزارا ساۋدا مەن ينۆەستيتسيالاردى ودان ءارى ارتتىرۋ مىندەتى تۇرعانىن اتاپ ءوتتى.

«ەلدەرىمىز اراسىندا كوپجوسپارلى ەكونوميكالىق بايلانىستاردى دامىتۋ بويىنشا جۇيەلى جۇمىس جۇرگىزىلىپ جاتىر. اتالعان باعىتتا ەكونوميكالىق ىنتىماقتاستىقتىڭ 2021-2025 جىلدارعا ارنالعان كەشەندى باعدارلاماسىن ۋاقىتىلى ىسكە اسىرۋدىڭ ماڭىزى زور»، — دەدى قر پرەمەر-ءمينيسترى.

سونداي-اق ءاليحان سمايىلوۆ ىنتىماقتاستىقتىڭ تاعى ءبىر ماڭىزدى باعىتى ونەركاسىپتىك كووپەراتسيا ەكەندىگىن اتاپ ءوتتى.

قازاقستاندا 13 ماڭىزدى بىرلەسكەن جوبا ىسكە اسىرىلدى. بىرقاتار سالادا، ونىڭ ىشىندە ماشينا جاساۋ، مەتاللۋرگيا جانە حيميا ونەركاسىبىندە قۇنى شامامەن $4 ملرد قۇرايتىن 22 ءىرى جوبا جۇزەگە اسىرىلىپ، كەيبىرى پىسىقتالىپ جاتىر.

«بۇل باعىتتا ءبىزدىڭ ودان ءارى دامۋ الەۋەتىمىز جوعارى. بىرلەسكەن جوبالاردى تەزىرەك ىسكە قوسۋعا مۇددەلىمىز جانە جان-جاقتى قولداۋ كورسەتۋگە دايىنبىز»، — دەدى قر ۇكىمەتىنىڭ باسشىسى.

ءاليحان سمايىلوۆ قازاقستان مەن رەسەي ەاەو، تمد، ۇقشۇ، شىۇ جانە اوسشك سياقتى ايماقتىق ۇيىمدار اياسىندا دا تابىستى ءوزارا ءىس-قيمىل ورناتقانىن اتاپ ءوتتى.

«قازاقستان-رەسەي ستراتەگيالىق ارىپتەستىگى الداعى ۋاقىتتا دا بارلىق باعىتتا جوعارى قارقىنمەن داميتىنىنا سەنىمدىمىن»، — دەپ تۇيىندەدى قر پرەمەر-ءمينيسترى.

ءوز كەزەگىندە ميحايل ميشۋستين بۇگىنگى كەزدەسۋ ەكى مەملەكەت پرەزيدەنتتەرىنىڭ 16 مامىردا ماسكەۋدە قول جەتكىزىلگەن كەلىسىمدەرىن دامىتۋ اياسىندا ءوتىپ جاتقانىن ايتتى.

«قازاقستانمەن دوستىعىمىزدى، تاتۋ كورشىلىك قارىم-قاتىناسىمىزدى، وداقتاستىعىمىزدى جوعارى باعالايمىز. ءبىز نەگىزگى باسىم مىندەتتەردىڭ ءبىرى رەتىندە قازاقستانمەن ساۋدا-ەكونوميكالىق ىنتىماقتاستىقتى كەڭەيتۋ ماسەلەسىن قاراستىرامىز», — دەدى ميحايل ميشۋستين.

رەسەي فەدەراتسياسى ۇكىمەتىنىڭ توراعاسى يمپورتتى الماستىرۋ باعدارلامالارىن جۇزەگە اسىرۋدىڭ پەرسپەكتيۆالارىن اتاپ ءوتتى.

«ونەركاسىپتە، ماشينا جاساۋدا، كولىك، ەنەرگەتيكا، تسيفرلىق ەكونوميكا سالالارىندا بىرلەسكەن جاڭا ستراتەگيالىق جوبالاردى ىسكە قوسۋعا جاعداي جاسالعان. بۇل ماسەلەلەر ءبىزدىڭ ۇكىمەتارالىق كوميسسيانىڭ تۇراقتى باقىلاۋىنا الىنعان», — دەدى م. ميشۋستين.

كەلىسسوز قورىتىندىسى بويىنشا تاراپتار ءوزارا ءتيىمدى ساۋدا-ەكونوميكالىق ىنتىماقتاستىقتى ودان ءارى نىعايتۋعا كەلىستى.

پىكىرلەر