Almatyda "Saryarqa" jáne "Baýyrjan Momyshuly" metro stanııalary iske qosyldy, dep habarlaıdy "Adyrna" ulttyq portaly.
Metronyń ashylýy 30 mamyr kúni ótti. Jańa stanııalar qazirgi qyzmet kórsetip turǵan toǵyz stanııanyń jalǵasy retinde qala ortalyǵyn jatyn aýdandarmen baılanystyrady.
Eki jańa stanııa iske qosylǵaly metro jelisiniń jalpy uzyndyǵy 3,1 shaqyrymǵa uzaryp, endi 13,4 shaqyrymdy quraıtyn boldy. Jeli boıyna 7-10 mınýt saıyn júretin tórtvagondy 15 elektr poıyzyn jiberý josparlanyp otyr.
Qazirgi tańda metro kúnine 45 myńǵa jýyq jolaýshy tasymaldaıdy. Jańa stanııalar iske qosylǵannan keıin bul kórsetkish kúnine 85 myń jolaýshyǵa deıin ósedi dep josparlanyp otyr.
"Máskeýden" keıingi "Saryarqa" stanııasy Abaı dańǵyly boıynda Altynsarın dańǵyly men Saın kósheleriniń aralyǵynda Family Park mańynda ornalasqan. Tereń salynǵan, eki kireberisi men bir vestıbıýli bar. Stanııada eki jedelsaty men segiz eskalator ornatylǵan. Interer jasaý kezindegi negizgi ıdeıa - Saryarqanyń sheksiz keń dalasynyń ásemdigin kórsetý. Qabyrǵalary mármár tastardan qurastyrylyp, granıtpen órnektelgen. Shetki jaǵyndaǵy qabyrǵada jazyq dalanyń ústinen shyǵyp kele jatqan kún, onyń bergi jaǵynda Qazaqstan astanasy beınesi mańynda shaýyp kele jatqan júırik attar beınelengen panno ornatylǵan.
"Baýyrjan Momyshuly" stanııasy Abaı dańǵyly boıynda Momyshuly kóshesiniń batysynda ornalasqan. Taıaz ornalasqan, eki vestıbıýl men alty kireberisi bar. Stanııada alty jedelsaty men on bes eskolator ornatylǵan. Platforma uzyndyǵy 108 metr Almaty metro jelisiniń on birinshi stanııasy ázirge sońǵy stanııa bolyp sanalady.
Stanııa úlken turǵyn alabynyń ortasynda ornalasqan. Qabyrǵalar men tireýishterdi bezendirý úshin ashyq reńkti marjan-sur tústi aǵash tektes keramıkalyq panelder, al edendi qaptaýǵa - ashyq sur tústi tabıǵı granıt paıdalanylǵan.
Bolashaqta "Qalqaman" stanııasy qurylysyn aıaqtap, metrony batys baǵytta "Barlyq" bazaryna deıin damytý josparlanǵan.
"Adyrna" ulttyq portaly
