ۋكراينا پرەزيدەنتى ۆلاديمير زەلەنسكي ۋكرايناعا قارۋ-جاراق جەتكىزۋ ماسەلەسى بويىنشا الداعى اپتادا "جاقسى جاڭالىق" كۇتەتىنىن مالىمدەدى، دەپ حابارلايدى "ادىرنا" ۇلتتىق پورتالى "azattyq.org"-قا سىلتەمە جاساپ.
"كۇن سايىن قورعانىستى كۇشەيتۋگە كۇش سالىپ جاتىرمىز. ەڭ ءبىرىنشى كەزەكتە قارۋ-جاراقپەن قامتاماسىز ەتۋ ماسەلەسىنە كوڭىل بولەمىز. ارميامىزدىڭ وككۋپانتتاردى تەحنولوگيالىق جانە تەگەۋرىندى سوققى تۇرعىسىنان باسىپ وزاتىن شاققا جاقىنداپ كەلەمىز. ارينە، كوپ نارسە ارىپتەستەرىمىزگە دە بايلانىستى. ولاردىڭ ۋكراينانى ەركىندىگىن قورعاۋعا قاجەت جاراقتارمەن قامتاماسىز ەتۋ دايىندىعىنا دا بايلانىستى. وسى تۇرعىدان العاندا كەلەسى اپتادا جاقسى جاڭالىق كۇتىپ وتىرمىن"- دەدى ۆ.زەلەنسكي.
ونىڭ ايتۋىنشا، رەسەي اسكەرىنىڭ شابۋىلىن توقتاتۋ ءۇشىن قارۋ-جاراقتىڭ بولعانى ماڭىزدى.
"جاعداي وتە كۇردەلى. اسىرەسە، دونباسس پەن حاركوۆ ماڭىنداعى اۋدانداردا جاعداي قيىن. رەسەي ارمياسى قانداي دا ءبىر ناتيجەگە قول جەتكىزۋگە تىرىسىپ جاتىر" -دەدى ۋكراينا پرەزيدەنتى.
"ادىرنا" ۇلتتىق پورتالى
