پەتروپاۆل حالىقارالىق اۋەجايى ءۇشىنشى رەت ساۋدا-ساتتىققا شىعارىلادى. بۇل تۋرالى سولتۇستىك قازاقستان وبلىسىنىڭ اكىمى قۇمار اقساقالوۆ قالاعا جاساعان جۇمىس ساپارى بارىسىندا ايتتى، دەپ حابارلايدى "ادىرنا" ۇلتتىق پورتالى "Azattyq Rýhy"-نا سىلتەمە جاساپ.
ءۇشىنشى كونكۋرسقا اۋەجاي مۇلكى باستاپقى قۇنى بويىنشا قويىلادى.
"ەكى بايقاۋ ءوتتى. ەشكىم ساۋدا-ساتتىققا شىققان جوق. سوندىقتان ءبىز بۇرىنعى 5,6 ملرد تەڭگە باعاسىن قايتا قويامىز. تومەندەتپەيمىز. تاعى ءبىر بايقاۋ جاريالانۋى مۇمكىن", - دەدى ايماق باسشىسى.وبلىس اكىمى اۋەجايدى قامتاماسىز ەتۋگە جىل سايىن بيۋدجەتتەن 200 ملن تەڭگەگە دەيىن قارجى جۇمسالاتىنىن، بۇل ۇلكەن سالماق ەكەنىن اتاپ ءوتتى.
"اۋەجاي جۇمىس ىستەيدى. بىراق اۆياتسيالىق قاۋىپسىزدىك قىزمەتى ول جەردە كوپ نارسە ىستەۋ كەرەك ەكەنىن ايتا بەرەدى. ۇلكەن ۇشاقتار كەشكى ۋاقىتتا ۇشىپ كەتۋى ءۇشىن قازىرگى زامانعى مۇناي بازاسى قاجەت، بۇل تاسىمالدار كولەمىن ۇلعايتۋعا مۇمكىندىك بەرەدى. ال ول ينۆەستيتسيالاۋ ارقىلى ورىندالادى. وندا كوپتەگەن ماماندار جۇمىس ىستەۋى كەرەك. وكىنىشكە وراي، ءبىز مۇنداي شىعىنداردى ءالى كوتەرە المايمىز. بيزنەستى جۇرگىزەتىن ينۆەستورلار قاجەت. رەيستەردى زەرتتەپ، حالىقارالىق اۆياكومپانيالارعا شىعىپ، تاسىمالداۋشىلارمەن كەلىسىپ، ۇشاقتارعا جانارماي قۇيۋ – بۇل تۇتاس ءبىر پروتسەسس. اكىمدىك مۇنىمەن اينالىسا المايدى", - دەدى اكىم.
