پۋتين باتىس ەلدەرىنىڭ "قاتە ەكونوميكالىق جانە قارجىلىق ساياساتى" جانە رەسەيگە قارسى سانكتسيالارى ازىق-تۇلىكپەن قامتاماسىز ەتۋدە قيىندىقتار اكەلگەنىن ايتتى. ول ەگەر سانكتسيالار جويىلسا، ماسكەۋ تىڭايتقىشتار مەن اۋىل شارۋاشىلىعى ونىمدەرىنىڭ ەكسپورتىن ارتتىرۋعا دايىن ەكەندىگىن العا تارتتى، دەپ حابارلايدى "ادىرنا" ۇلتتىق پورتالى.
پرەزيدەنت ۆلاديمير پۋتين فرانتسيا باسشىسى ەممانۋەل ماكرونمەن جانە گەرمانيا كانتسلەرى ولاف شولتسپەن تەلەفون ارقىلى سويلەستى، دەپ جازدى كرەمل سايتى.
"ولار الەمدەگى ازىق-تۇلىك قاۋىپسىزدىگى جاعدايىن تالقىلادى. پۋتين جەتكىزۋدەگى قيىندىقتاردىڭ "باتىس ەلدەرىنىڭ قاتە ەكونوميكالىق جانە قارجىلىق ساياساتتارى" مەن رەسەيگە قارسى سانكتسيالارىنىڭ سالدارىنان تۋىنداعانىن ايتتى. "رەسەي تىڭايتقىشتارى مەن اۋىلشارۋاشىلىق ونىمدەرىن جەتكىزۋدىڭ ارتۋى سونىمەن قاتار الەمدىك ازىق-تۇلىك نارىعىنداعى شيەلەنىستى ازايتادى، بۇل ارينە، ءتيىستى سانكتسيالىق شەكتەۋلەردى الىپ تاستاۋدى تالاپ ەتەدى", - دەلىنگەن كرەمل مالىمدەمەسىندە.
پۋتين رەسەيدىڭ قارا تەڭىز پورتىنان ۋكراين استىعىن كەدەرگىسىز ەكسپورتتاۋ نۇسقالارىن تابۋعا كومەكتەسۋگە دايىن ەكەنىن ايتتى. مامىر ايىنىڭ باسىندا بۇۇ بۇل جەردە 4,5 ميلليون تونناعا جۋىق استىق جينالعانىن، رەسەيدىڭ ۋكرايناداعى اسكەري وپەراتسياسىنا بايلانىستى ونى شىعارا الماعانىن حابارلاعان ەدى. بۇۇ رەسەيدىڭ ارەكەتى قازىرگى جاعدايعا اكەلدى دەپ سانايدى جانە كەيبىر باتىس ساياساتكەرلەرى مۇنىمەن كەلىسەدى. الايدا كرەمل ۋكراينانىڭ استىق جەتكىزۋىنە توسقاۋىل قويۋدا باتىس ەلدەرىنىڭ "زاڭسىز ارەكەتتەرىن" ايىپتايدى.
گەرمانيا مينيسترلەر كابينەتىنىڭ رەسمي وكىلى شتەففەن حەبەشترەيتتىڭ ايتۋىنشا، ءۇش كوشباسشى اراسىنداعى اڭگىمە 80 مينۋتقا سوزىلعان، ول ماكرون مەن شولتستىڭ باستاماسىمەن وتكەن.
ولار ءپۋتيندى ۋكرايناداعى اتىستى دەرەۋ توقتاتۋعا، رەسەيلىك اسكەرلەردى شىعارۋعا جانە ۋكراينا پرەزيدەنتى ۆلاديمير زەلەنسكيمەن تىكەلەي كەلىسسوزدەر جۇرگىزۋگە شاقىردى. ماكرون مەن ءشولتستىڭ ايتۋىنشا، رەسەيدىڭ ارەكەتىنەن ازىق-تۇلىك جاعدايى ەرەكشە شيەلەنىسە ءتۇستى. اڭگىمە بارىسىندا "پۋتين ۋكراينادان استىقتى تەڭىز ارقىلى ەكسپورتتاۋعا رۇقسات بەرگىسى كەلەتىنىنە سەندىردى", - دەپ حابارلايدى گەرمانيا كانتسلەرىنىڭ سايتى.
"ادىرنا" ۇلتتىق پورتالى.
