شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان قالاداعى مەكتەپتەردىڭ بىرىنە ارنايى بارىپ، سوڭعى قوڭىراۋ سالتاناتىنا قاتىستى، دەپ حابارلايدى "ادىرنا" ۇلتتىق پورتالى.
بۇل تۋرالى ول ءوزىنىڭ ينستاگرامم پاراقشاسىندا جازدى. ونىڭ ايتۋىنشا، بيىل شىمكەنت قالاسىندا 11 189 تۇلەك مەكتەپ ءبىتىرىپ جاتىر.
“قۇرمەتتى تۇلەكتەر! مەكتەپ ءبىتىرۋ - بۇل ەرەسەك ومىرگە باسقان العاشقى قادام. ومىردە، قالايسىڭ با، قالامايسىڭ با، قيىندىقتارعا كەزىگەسىڭ. جولىڭ بولمايدى، ءساتىن سالمايدى. نەگىزى، قيىندىقتىڭ ءوزى قيىن ەمەس، ودان ساباق الىپ، سۇرىنگەن جەرىڭنەن جىگەرلەنە قايتا تۇرۋ قيىن. وسىدان 22 جىل بۇرىن مەكتەپ ءبىتىرىپپىن. اۋىلدا استىما ءمىنىپ جۇرگەن جالعىز اتىمدى ساتىپ، 2000 جىلدىڭ جازىندا ارمان قۋىپ الماتىعا اتتاندىم. ۇبت تاپسىردىم. وتە الماي، جوعارعى وقۋ ورنىنا گرانتقا تۇسە الماي قالدىم.
الدىمدا ەكى جول تۇردى. ءبىرىنشىسى العاشقى قادامىمنىڭ ءساتسىز باستالعانىن سەبەپ ەتىپ، اۋىلعا ورالۋ، ەكىنشىسى سىناقتان مۇمكىندىك ىزدەۋ. وڭايى - قولدى ءبىر سىلتەۋ، قيىنى - ءوزىڭدى قامشىلاۋ. قيىن جولدى تاڭدادىم. اقىلى بولسا دا وقۋعا ءتۇستىم. اعىلشىن جانە يسپان تىلدەرىنىڭ اۋدارماشىسى ماماندىعىن مەڭگەردىم.
ستۋدەنتتىڭ ءومىرى جۇپىنى. ءبىرىنشى كۋرستان باستاپ ەڭبەككە ارالاسىپ ءجۇرىپ جوعارعى وقۋ ورنىن ءتامامدادىم. ەندىگى ارمانىم وقۋدى شەتەلدە جالعاستىرۋ بولدى.
ءۇش جىل ەڭبەك ەتكەن سوڭ، 2006 جىلى “بولاشاق” باعدارلاماسىنا تاپسىردىم، بىراق وتە الماي، وقۋعا تۇسە الماي قالدىم.
الدىمدا تاعى دا ەكى جول تۇردى. ءبىرىنشىسى، شەتەلدە وقۋدى ۇمىتۋ، ەكىنشىسى تاجىريبە جيناپ، باعىمدى تاعى دا سىناپ كورۋ.
تاعى دا قيىن جولدى تاڭدادىم. سەگىز جىل وتكەن سوڭ، 2014 جىلى “بولاشاق” ستيپەندياسىن يەمدەنىپ، جۇمىستان وقۋ دەمالىسىن الىپ، 2016 جىلى امەريكاعا اتتاندىم. گارۆارد ۋنيۆەرسيتەتىنە ءتۇستىم.
قۇرمەتتى تۇلەكتەر، ەشقاشان وڭاي جولدى تاڭداماڭىزدار. ومىردە قيىندىق قانا شىڭداپ شىعادى. ساتسىزدىك - ءومىردىڭ سوڭى ەمەس، باسى. سۇرىنگەنىڭ ايىپ ەمەس، قايتا تۇرىپ جۇگىرمەگەنىڭ ايىپ", — دەپ جازدى ول.
"ادىرنا" ۇلتتىق پورتالى
