Shymkent qalasy ákiminiń birinshi orynbasary Shyńǵys Muqan qaladaǵy mektepterdiń birine arnaıy baryp, sońǵy qońyraý saltanatyna qatysty, dep habarlaıdy "Adyrna" ulttyq portaly.
Bul týraly ol óziniń ınstagramm paraqshasynda jazdy. Onyń aıtýynsha, bıyl Shymkent qalasynda 11 189 túlek mektep bitirip jatyr.
“Qurmetti túlekter! Mektep bitirý - bul eresek ómirge basqan alǵashqy qadam. Ómirde, qalaısyń ba, qalamaısyń ba, qıyndyqtarǵa kezigesiń. Jolyń bolmaıdy, sátin salmaıdy. Negizi, qıyndyqtyń ózi qıyn emes, odan sabaq alyp, súringen jerińnen jigerlene qaıta turý qıyn. Osydan 22 jyl buryn mektep bitirippin. Aýylda astyma minip júrgen jalǵyz atymdy satyp, 2000 jyldyń jazynda arman qýyp Almatyǵa attandym. UBT tapsyrdym. Óte almaı, joǵarǵy oqý ornyna grantqa túse almaı qaldym.
Aldymda eki jol turdy. Birinshisi alǵashqy qadamymnyń sátsiz bastalǵanyn sebep etip, aýylǵa oralý, ekinshisi synaqtan múmkindik izdeý. Ońaıy - qoldy bir silteý, qıyny - ózińdi qamshylaý. Qıyn joldy tańdadym. Aqyly bolsa da oqýǵa tústim. Aǵylshyn jáne ıspan tilderiniń aýdarmashysy mamandyǵyn meńgerdim.
Stýdenttiń ómiri jupyny. Birinshi kýrstan bastap eńbekke aralasyp júrip joǵarǵy oqý ornyn támamdadym. Endigi armanym oqýdy shetelde jalǵastyrý boldy.
Úsh jyl eńbek etken soń, 2006 jyly “Bolashaq” baǵdarlamasyna tapsyrdym, biraq óte almaı, oqýǵa túse almaı qaldym.
Aldymda taǵy da eki jol turdy. Birinshisi, shetelde oqýdy umytý, ekinshisi tájirıbe jınap, baǵymdy taǵy da synap kórý.
Taǵy da qıyn joldy tańdadym. Segiz jyl ótken soń, 2014 jyly “Bolashaq” stıpendııasyn ıemdenip, jumystan oqý demalysyn alyp, 2016 jyly Amerıkaǵa attandym. Garvard ýnıversıtetine tústim.
Qurmetti túlekter, eshqashan ońaı joldy tańdamańyzdar. Ómirde qıyndyq qana shyńdap shyǵady. Sátsizdik - ómirdiń sońy emes, basy. Súringeniń aıyp emes, qaıta turyp júgirmegeniń aıyp", — dep jazdy ol.
"Adyrna" ulttyq portaly
