اقمولا وبلىسىنىڭ قوشقارباەۆ اۋىلى ماڭىنداعى زيراتتى سۋ باسىپ، مارقۇمداردىڭ سۇيەگى جەر بەتىنە شىعىپ جاتىر، دەپ حابارلايدى “ادىرنا” ۇلتتىق پورتالى “الماتى” تەلەارناسىنا سىلتەمە جاساپ.
تۇرعىنداردىڭ ايتۋىنشا، قانشا دابىل قاققانمەن اكىمدىك ەش ارەكەت ەتپەيدى. ال ايماقتىڭ اق جاعالىلارى مازاردى قورعاۋعا قازىنادان قاراجات تاپپاي جاتقاندارىن جەتكىزدى.
بۇل زيرات ەلوردادان 40 شاقىرىم جەردە ورنالاسقان. نۇرا وزەنى ارناسىنان اسىپ تاسىعاندا سۋ باسىپ، مارقۇمداردىڭ سۇيەگىن شايىپ كەتىپ جاتىر. جاقىندارى جەرلەنگەن زيراتتىڭ جاعدايىنا الاڭداعان جۇرتشىلىقتىڭ امالى تاۋسىلعان. سۋ جەر بەتىنە شىعارىپ تاستاعان سۇيەكتەردى قايتا كومىپ وتىرامىز دەيدى.
«جىلدا قولعا ىلىنگەنىن، كوزگە كورىنگەنىن وسى زيراتتىڭ جانىندا، اۋىلدىڭ ازاماتتارى يماممەن، اكىمشىلىكپەن بىرگە كەلىپ، سۇيەكتەردى جيناپ دۇعاسىن وقىپ، قايتادان زيراتتىڭ بۇرىشىنا كومىپ جاتىر. جۇرەگىمىزدى اۋىرتادى»، – دەدى ر. قوشقارباەۆ اۋىلىنىڭ تۇرعىنى سەيىت ىبىراەۆ.
ماسەلە 5 جىل بۇرىن باستالعان. وزەن ارناسىنىڭ وزگەرۋىنە ەلورداداعى قۇرىلىس كومپانيالارىنىڭ زاڭسىز ارەكەتتەرى سەبەپ بولىپتى. ولار قاراجات ۇنەمدەۋ ماقساتىندا تەگىن تاس پەن توپىراق الىپ، سوڭى وسىنداي پروبلەماعا اكەپ سوققانىن ايتادى. ال وزەن سۋىن تۇرعىندار قاجەتتىلىكتەرىنە دە قولدانادى ەكەن.
«سول سۋدى ءبىز وگورودقا قولدانامىز. بالالار شومىلادى. جاز بويى سول كوپىردىڭ جانىندا قالادان، باسقا جەرلەردەن دەمالۋعا كەلەتىن ادامدار بار. سول سۋدىڭ استىندا بالىققا قاراعاندا ادامنىڭ سۇيەگى كوپ. ول تالاي دالەلدەنگەن»، – دەدى ر. قوشقارباەۆ اۋىلىنىڭ تۇرعىنى سەيىت ىبىراەۆ.
ماسەلە جونىندە وبلىس، اۋدان باسشىلارى حاباردار. تۇرعىنداردىڭ ايتۋىنشا، جوبالىق-سمەتالىق قۇجاتتارى ازىرلەگەندەرىن دە جەتكىزگەن. بيۋدجەتتەن قاراجات بولىنگەن بويدا نۇرا وزەنىنىڭ ارناسىن وزگەرتۋدى جوسپارلاعان. اكىمدىك وكىلدەرى بولسا، تۇرعىنداردىڭ ءسوزىن راستاپ، وسىدان 3 جىل بۇرىن جۇمىس توبى قۇرىلعانىن، قاراجات ءبولىنۋ قاراستىرعانىن ايتادى.
«2019-2020 جىلدارعا وبلىستان قاراجات قاراستىرىلماعان، ءسوزدىڭ اشىعى. ءبىز اۋداننان جىبەردىك، بىراق وبلىستان توقتاپ قالدى. بۇگىنگى تاڭدا جوبالىق-سمەتالىق قۇجاتتى جاساۋ ءۇشىن ەسەپتەۋ جۇمىسىنا بيۋدجەتكە تاپسىرىس جاسالدى. ەسەپتەۋ جۇمىسى بىتكەننەن كەيىن جوبالىق-سمەتالىق قۇجاتقا قاراجات قاراستىراتىن شىعارمىز»، – دەدى تسەلينوگراد اۋدانى تۇرعىن ءۇي ينسپەكتسياسى جانە كوممۋنالدىق شارۋاشىلىق ءبولىمىنىڭ باسشىسى مەلس جۇماباەۆ.
اۋداندىق اكىمدىك جىل سايىن جوبالىق-سمەتالىق قۇجاتتار جاساۋعا قاراجات شىعىنداپ الەك بولىپ جاتقاندا، 50 جىلدان اسقان قورىمنىڭ بۇگىندە ۇشتەن ءبىر بولىگى قالعان. ەڭ سوراقىسى جۇرتشىلىق مۇنىڭ سوڭى ەكولوگيالىق ماسەلەگە اكەلىپ، اۋىل تۇرعىندارى اراسىندا اۋرۋ تاراپ كەتۋ قاۋپى بار دەپ الاڭدايدى.
“ادىرنا” ۇلتتىق پورتالى
