رەسەي پرەزيدەنتى ۆلاديمير پۋتين تۇركىمەنستان پرەزيدەنتى سەردار بەردىمۇحامەدوۆتى "دوستىق" وردەنىمەن ماراپاتتادى، دەپ حابارلايدى "ادىرنا" ۇلتتىق پورتالى.
بۇل ماراپات رەسەيلىك جانە شەتەلدىك ازاماتتارعا بەيبىتشىلىكتى، حالىقتار اراسىنداعى دوستىق پەن ارىپتەستىكتى نىعايتۋداعى ەرەكشە ەڭبەگى ءۇشىن بەرىلەدى.
رەسەي فەدەراتسياسىنىڭ باسشىسى ۆلاديمير پۋتين تۇركىمەنستان باسشىسى سەردار بەردىمۇحامەدوۆتى تۇركىمەن-رەسەي قارىم-قاتىناستارىن كەڭەيتۋگە قوسقان جەكە ەرەكشە ۇلەسى ءۇشىن "دوستىق" وردەنىمەن ماراپاتتاپ، ءتيىستى جارلىققا قول قويدى.
بۇل تۋرالى رەسەيلىك قۇقىقتىق اقپاراتتىڭ رەسمي ينتەرنەت-پورتالى جازدى.
"رەسەي فەدەراتسياسى مەن تۇركىمەنستان اراسىنداعى ستراتەگيالىق ارىپتەستىكتى نىعايتۋعا قوسقان زور ۇلەسى ءۇشىن بەردىمۇحامەدوۆ سەردار گۋربانگۋلىۇلىن "دوستىق" وردەنىمەن ماراپاتتايدى", – دەپ اتاپ وتىلگەن قۇجاتتا.
اكەسىنەن كەيىن تاققا وتىرعان تۇركىمەنستاننىڭ جاڭا پرەزيدەنتىنىڭ پۋتينمەن "دوستىعى" قازىر جەلىلەردە تالقىلانىپ جاتىر.
"ادىرنا" ۇلتتىق پورتالى.
