تاجىكستاندا ءبىر اپتاعا جۋىق ۋاقىتتان بەرى تاۋلى باداحشان اۆتونوميالىق ايماعىنداعى نارازىلىق شارالارى سالدارىنان شيەلەنىسكەن جاعداي ءالى دە ساقتالىپ وتىر. رەسمي مالىمەتكە سۇيەنسەك، كەمىندە 8 ادام قازا تاۋىپ، 11 ادام جارالانعان. دەگەنمەن، جەرگىلىكتى تەلەگرام-ارنالاردىڭ حابارلاۋىنشا، قۇرباندار مەن زارداپ شەككەندەر بۇدان دا كوبىرەك بولۋى مۇمكىن، دەپ حابارلايدى “ادىرنا” ۇلتتىق پورتالى.
تاجىكستان ىشكى ىستەر مينيسترلىگىنىڭ مالىمەتىنشە، 18 مامىردا تاۋلى باداحشاننىڭ رۋشان اۋدانىندا «انتيتەررورلىق وپەراتسيا» وتكەن. ول «قوعامدىق-ساياسي جاعدايدى تۇراقسىزداندىرۋ» ماقساتىندا «200 ۇيىمداسقان قىلمىستىق توپ» اۋعانستانمەن شەكاراداعى تاس جولدى جاۋىپ تاستاعاننان كەيىن باستالدى. الايدا جەرگىلىكتى تەلەگرام كانالدارى لاڭكەستەردىڭ بولماعانىن جازادى.
تاجىكستان بيلىگىنىڭ حابارلاۋىنشا، قارۋلى ادامدار ەلدىڭ ۇلتتىق قاۋىپسىزدىك مەملەكەتتىك كوميتەتىنىڭ لاڭكەستىككە قارسى ارنايى بولىمشەسىنىڭ كولىكتەر كولونناسىنا شابۋىل جاساعان.
ال «وزودي» راديوسىنىڭ حابارلاۋىنشا، تاۋلى باداحشانداعى جاعداي مامىردىڭ 14-ءى كۇنى حوروگ قالاسىنىڭ (اۆتونوميالىق وبلىستىڭ اكىمشىلىك ورتالىعى) جۇزدەگەن تۇرعىنى نارازىلىق ءبىلدىرىپ، گباو باسشىسى الىشەر ميرزونابوت پەن وبلىس مەرىنىڭ وتستاۆكاعا كەتۋىن تالاپ ەتكەن. سونىمەن قاتار، نارازىلار حوروگتاعى بارلىق باقىلاۋ-وتكىزۋ بەكەتتەرىن الىپ تاستاۋدى، وبلىس تۇرعىندارىن قۋدالاۋدى توقتاتۋدى، بۇرىن ۇستالعان جانە سوتتالعان بەلسەندىلەردى بوساتۋدى تالاپ ەتتى.
ايتا كەتەيىك، تاۋلى باداحشان (نەمەسە پامير) ءوزىنىڭ ەلدىڭ قالعان بولىگىنەن وقشاۋلانعاندىعىمەن تانىمال. ايماق اۋعانستانمەن شەكتەسەدى.
اۆتونوميانىڭ مەملەكەتتىك ءتىلى تاجىك ءتىلى بولعانىمەن، باداحشان تۇرعىندارى پامير تىلدەرىندە سويلەيدى. تاجىكتەردىڭ كوپشىلىگى سۋننيتتەر بولسا، پاميرلىكتەر يسلامنىڭ شيت تارماعىنىڭ ءبىر تارماعى – ءيسمايليزمدى ۇستانادى.
“ادىرنا” ۇلتتىق پورتالى
