الماتى وبلىسىنىڭ تۇرعىنى سۇلتانعازيەۆا نازىم ساكەنقىزى الاياقتاردىڭ ايلاسىنا ءتۇسىپ قالدى. ول 14 مامىر كۇنى ينتەرنەت دۇكەنى ارقىلى تاۋار الامىن دەپ، اقشاسىن اۋدارىپ الدانىپ قالعان. ءجابىرلانۋشى «ادىرنا» ۇلتتىق پورتالىنا وقيعانىڭ ءمان-جايىن بايانداپ بەردى.
“Olx ينتەرنەت دۇكەنى ارقىلى حولوديلنيك جارناماسىن كورىپ 8707 914 5842 (الەكساندر ۆيكتوروۆيچ) نومەرىنە ۆاتساپ جەلىسى ارقىلى حابارلاستىم. جازعان حابارلامامدى وقىپ، ول ماعان ۆاتساپ ارقىلى حابارلاستى. 75 مىڭ تەڭگەگە كەلىسىپ، قر-نىڭ بارلىق جەرىنە جەتكىزىپ بەرەتىنىن ايتتى. قۇجاتتارىمدى جىبەرەيىن، كوشىپ جاتقان ەدىم، ادرەسىڭىزدى جىبەرىڭىز دەدى دە قۇجاتتارىن جىبەردى. اقشا اۋدارساڭىز ماشينا قازىر شىعادى دەدى دە، ۆوديتەلدىڭ قۇجاتتارى مەن قاپتالعان حولوديلنيكتىڭ سۋرەتىن جىبەردى. سوسىن مەن وعان ول جىبەرگەن سچەت نومەرىنە 170 دوللار جىبەردىم. ول ماعان حابارلاسىپ جيھازداردىڭ قىمبات ەكەنىن ايتىپ، ايەلى سەنبەي جاتىر ماعان جەكە كۋالىك جىبەرىڭىز دەدى، مەن وعان جەكە كۋالىگىمدى جىبەردىم. زاتتى انە شىعادى، مىنە شىعادى دەگەن سوڭ مەن سەنبەيتىنىمدى ايتىپ ەدىم، كارتوچكاڭىزدى جىبەرىڭىز، اقشاڭىزدى قايتارايىن دەدى. مەن كارتوچكامدى جىبەردىم”، - دەيدى نازىم.
ايتۋىنشا، وعان اسكەردە جۇمىس ىستەيتىنىن العا تارتىپ،سۋرەتى مەن قۇجاتتارىن جىبەرىپ سەنىمىنە كىرگەن. الايدا، “ادىرنا” تىلشىلەرىنىڭ انىقتاۋىنشا سۋرەتتەگى اسكەري ادام دا جابىرلەنۋشى ەكەن. شابۋىل جاساۋشىلار ونىڭ دەرەكتەرىن، سونىڭ ىشىندە فوتوسۋرەتتەرىن ادامدارعا سەنىم ۇيالاتۋ جانە ولارعا جوق تاۋارلاردى ساتۋ ءۇشىن پايدالاناتىن كورىنەدى.
“تاعى قانداي زاتتار كەرەك ەدى، ءبارىن ءبىر ادامعا ساتقانىم دۇرىس، ءتۇسىرىپ بەرەمىن، اقشاڭىز جەتپەسە راسسروچكاعا الىڭىز دەدى دە باسقا جيھازداردىڭ سۋرەتىن جىبەردى. مەن تاعى دا تەلەۆيزور، ديۆان، ستول كەرەكتىگىن ايتتىم. ول ماعان قانشا اقشاڭىز بار دەددى، مەن 50000 تەڭگەم بار دەپ ەدىم، راسسروچكاعا كەلىستى. مەن وعان تاعى 116 دوللار اۋداردىم، دوللار ارقىلى اۋدارۋ سەبەبىم، ول ماعان حالىق بانكپەن، حالىقارالىق اۋدارىممەن اۋدارۋىمدى ءوتىندى. ديۆاندى 140 مىڭ، ستولدى 110 مىڭ، تەلەۆيزوردى 90 مىڭ دەدى. بارلىعى 340 مىڭ بولادى، ماعان جارتى اقشاسىن جىبەرىڭىز، ءبارىن باسىپ جىبەرە المايمىن دەدى. مەن تاعى 290 دوللار اۋداردىم”، - دەپ بايانداپ بەردى نازىم.
سونداي-اق، الەكساندر ەسىمىن جامىلعان الاياق نازىمعا ۆاتساپ جەلىسى ارقىلى حابارلاسىپ، شوتىنا 125 مىڭ اۋدارعانىن، ونى دوللارعا اينالدىرىپ، قايتا اۋدارۋىن سۇراعان. كەيىن تاعى دا 60 مىڭ تەڭگەدەن 2 رەت اۋدارىپ، حالىقارالىق اۋدارىم ارقىلى جىبەرۋىن ءوتىنىپتى.
“ول كىسىگە ايتىپ ەدىم اقشا تۇسپەي زات جىبەرمەيتىنىن، ۆوديتەلدى توقتاتقانىن ايتتى. سوندىقتان امال جوق كۇيەۋىمە بولعان جايدى ءتۇسىندىرىپ ايتىپ، تاعى دا 145 دوللاردان ەكى رەت اۋدارىپ بەرسەك زاتتىڭ كەلەتىنىن ايتىپ كۇيەۋىمنىڭ شوتىنان ەكى رەت 145 دوللار اۋدارىپ بەردىك. جۇرگىزۋشى حابارلاسىپ، ەرتەڭ تاڭەرتەڭگى ساعات 7:30-دا بولاتىننىن ايتتى. ەرتەسىندە، ياعني 15 مامىر كۇنى ساع 7:50دا ۆوديتەلگە جازدىم، ەشقانداي جاۋاپ بەرمەدى. الەكساندر ۆيكتوروۆيچكە 8:22- دە جازىپ ەدىم، ساع 10-دار شاماسىندا حابارلاستى دا 138 دوللار تۇسپەگەنىن، ياعني ءوزى جىبەرگەن 60 مىڭ تەڭگەنى ايتتى. مەن رەنجىپ ەدىم، تەلەفوندى قويا سالدى. ءبىراز ۋاقىتتان كەيىن حابارلاسىپ اقشاڭىزدىڭ ءبارىن قايتارايىن، 290دوللاردى قاشان تۇسەدى،سول كەزدە قايتاراتىنىن ايتىپ، دوستاۆكانى OLX ارقىلى وتمەنا جاساۋ كەرەك دەپ، سىزگە بارعان حابارلاماداعى كودتى ايتۋىمدى ءوتىندى. مەن وعان كودتى ايتپادىم. تانىستارعا ايتىپ ول كىسى جايلى ءبىلىپ بەرۋىن ءوتىنىپ ەدىم، ول كىسىنىڭ موشەننيك ەكەنى بەلگىلى بولدى. سول كەزدە موشەننيكتەرگە الدانىپ قالعانىمدى ءتۇسىندىم”،- دەپ كۇيىندى ول.
كەيىن جىبەرگەن كولىكتىڭ جۇرگىزۋشىسىنىڭ نومەرىنە حابارلاسسا، ول دا جابىرلەنۋشى بولىپ شىقتى. نازىم الاياقتىڭ سۇراۋى بويىنشا، وعان بانك كارتاسى مەن قۇجاتتارىنىڭ سۋرەتتەرىن جىبەرگەن. ەندى ول، مەنىڭ دە سۋرەت پەن قۇجاتتارىم ارقىلى وزگەلەردى الداي ما، دەپ قورقىپ وتىر. ويتكەنى، الاياق ءالى دە ينتەرنەت دۇكەنى ارقىلى تاۋارلاردىڭ سۋرەتىن جارنامالاۋدى توقتاتپاعان.
بۇل تۋرالى نازىم پوليتسيا بولىمىنە ارىز جازدى. قىلمىستىق ءىس قوزعالعانىمەن، الاياقتى ۇستاۋ مۇمكىن بولمادى. پوليتسەيلەر مۇنداي قىلمىستى اشۋ وتە قيىن ەكەنىن ايتقان.
“ادىرنا” ۇلتتىق پورتالى
