“ۇلى دالا تاڭى” دەگەن ءفيلمدى تاماشالاپ كەلدىك. اللا دەگەن سوزدەن قۇلاق تۇندى. نامازعا دا قايتا-قايتا جارناما جاسادى. اقان ساتاەۆ جۇرگەن جەردە ءدىننىڭ ۇستەمدىك ەتەتىنى "قازاقفيلمگە" باسشى بولىپ كەلگەننەن-اق ءبىلىپ جۇردىك.
اقورداداعى يدەولوگتارمەن كەلىسىپ تۇسىرگەندىكتەن ولار حالىقتى تۇگەل تىزە بۇكتىرىپ يماندىلىققا بەت بۇرعىزعىسى كەلەدى مە دەگەن وي كەلدى. ءشاھيد، عازاۋات دەگەن كىرمە سوزدەر ءورىپ ءجۇر. ەرىك جولجاقسىنوۆ قانا اللا دەي بەرۋگە اۋزى بارماعان سياقتى بولىپ كورىندى.
فيلمدە قازاقتارعا "عازاۋات" جاريالايدى. ماعىناسى - ارابتاردىڭ ءدىن جولىنداعى قاسيەتتى جورىعى..
كەيىپكەرلەردى بارىنشا ءور تۇلعالى، ءىرى، ەتىپ كورسەتكىسى كەلگەن. ونى وبەكتيۆتىڭ ءتۇسىرۋ بيىكتىگىنەن كورۋگە بولادى. جەرگە جاقىن الىپ تۇسىرگەن، ال ادامعا كەلگەندە كوكىرەك تۇسىنان جوعارىلامايدى.
ورەسى تومەن ادام ءدىندار بولسا، ءتىپتى قيىن ەكەن. تەكست ءالسىز، تىم قارابايىر. "كوشپەندىلەر" ءفيلمىنىڭ جالعاسى سياقتى تۇسىرىلگەن. بىراق ونداعى ۆيجۋال قاتەلەردى قايتالاماعان.
ماسشتاب بار. كرۋپنىي پلانمەن تابيعاتتىڭ اسەمدىگىن مايدان دالاسىن، شايقاسۋ ساتتەرىن جاقسى كورسەتكەن. ەكى كادردى اينىتپاي ريدلي سكوتتىڭ "تسارستۆو نەبەسنوە" فيلىمىنەن الىپتى. كورگەن ادام بىردەن تانيدى.
قۇداي، ءتاڭىر، ارۋاق دەگەن ءبىر ءتۇيىر ءسوز ايتىلمادى. سوڭىنا دەيىن كۇتتىم. ءتىپتى سوڭىندا شىعاتىن جازۋدان دا الىپ تاستاعان. "بابالارعا باعىشتالادى" دەپ قاتىرادى.
مەسسەدج تۇسىنىكتى. ەل بولايىق، بىرىگەيىك دەگەنگە سايادى. بىراق ءدىندى نەگە بۇلاي قارابايىر جولمەن تىقپالاعانى تۇسىنىكسىز.
مەنىڭ ويىمشا، يسلام ەركىندىكتى سۇيەتىن، قۇلدىقتى مويىندامايتىن، ادىلەتسىز حانعا باعىنبايتىن كوشپەندى حالىقتىڭ فيلوسوفياسىنا كەلمەيدى. يسلام ءدىنى - حانعا قارسى شىقپايتىن، وتىرىقشى حالىقتارعا مايداي جاعادى. ال كوشپەندىلەر حان ۇناماسا كوشىپ كەتە سالاتىن بولعان.
ابزال دوسىم،
جۋرناليست، بلوگەر.
