ءاربىر اكىم وڭىردەگى جولداردىڭ جاي-كۇيىنە تىكەلەي جاۋاپتى — سمايىلوۆ

2419
Adyrna.kz Telegram

قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ۇكىمەتتىڭ كەزەكتى وتىرىسىندا اۆتوجول سالاسىن دامىتۋ ماسەلەلەرى قارالدى. قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ، الماتى وبلىسىنىڭ اكىمى قانات بوزىمباەۆ، جامبىل وبلىسىنىڭ اكىمى نۇرجان نۇرجىگىتوۆ، اتىراۋ وبلىسىنىڭ اكىمى سەرىك شاپكەنوۆ بايانداما جاسادى.

يندۋستريا جانە ينفراقۇرىلىمدىق دامۋ مينيسترلىگىنىڭ دەرەكتەرىنە سايكەس، ەلىمىزدىڭ اۆتوموبيل جولدارىنىڭ جالپى ۇزىندىعى 96 مىڭ شاقىرىمدى قۇرايدى، ونىڭ ىشىندە 25 مىڭ كم – رەسپۋبليكالىق ماڭىزى بار جولدار، 71 مىڭ كم — وبلىستىق جانە اۋداندىق ماڭىزى بار جولدار. 2025 جىلعا دەيىن نورماتيۆتىك تالاپتارعا سايكەس رەسپۋبليكالىق ماڭىزى بار جولداردىڭ ۇلەسىن 100%-عا، جەرگىلىكتى جولداردىڭ وسىنداي ۇلەسىن 95%-عا دەيىن جەتكىزۋ كوزدەلگەن.

پرەمەر-ءمينيستردىڭ ايتۋىنشا، اقىلى جۇيەگە اۋىسىپ جاتقان جولداردىڭ جاعدايىنا قاتىستى حالىقتىڭ شاعىمى دا بار. وسىعان وراي «قازاۆتوجول» ۇك» اق-عا جولداردى كۇتىپ-ۇستاۋ ساپاسى مەن قاۋىپسىزدىگى بويىنشا جۇمىستى كۇشەيتۋ تاپسىرىلدى.

دۇنيەجۇزىلىك ەكونوميكالىق فورۋمنىڭ دەرەكتەرىنە سايكەس، قازاقستان جول ساپاسى جاعىنان الەمدە 93-ورىندا.

«مەملەكەت باسشىسى جولداردىڭ ناشار جاعدايىن بىرنەشە رەت ايتتى. ءاربىر اكىم وڭىردەگى جولداردىڭ جاي-كۇيىنە تىكەلەي جاۋاپتى ەكەنىن اتاپ وتكىم كەلەدى»، — دەدى ءاليحان سمايىلوۆ.

«ادىرنا» ۇلتتىق پورتالى

پىكىرلەر