«قازاقستان حالقىنا» قورى تىرەك-قوزعالىس اپپاراتىندا اقاۋى بار بالالاردى روبوتتاندىرىلعان قۇرىلعىلارمەن (ەكزوسكەلەت) قامتاماسىز ەتۋ بويىنشا قايىرىمدىلىق باعدارلاماسىن ىسكە قوستى، دەپ حابارلايدى «ادىرنا» ءتىلشىسى.
«تەحنيكالىق وڭالتۋ قۇرالدارىن، ونىڭ ىشىندە ەكزوسكەلەتتەردى بالالارى ءۇشىن قاجەت ەتەتىن اتا-انالاردان 300-دەن استام ءوتىنىش كەلىپ ءتۇستى. باعدارلاما اياسىندا جىل سوڭىنا دەيىن 13 ەكزوسكەلەت شىعارۋ جوسپارلانسا، ونىڭ 4-ەۋى بويىنشا ولشەۋ جۇرگىزىلىپ، ءوندىرىس پروتسەسى جانداندى»،– دەلىنگەن حابارلامادا.
13 بالانى ەكزوسكەلەتپەن قامتاماسىز ەتۋ ءۇشىن «قازاقستان حالقىنا» قورى 117 ميلليون تەڭگە ءبولىپ وتىر.
ەكزوسكەلەتتەر – بۇل تسەرەبرالدى سال اۋرۋى، مي جاراقاتى، جۇلىن جاراقاتتارى، پاراپلەگيا، بۇلشىقەت ديستروفياسى، رەتت سيندرومى جانە باسقا دا اۋرۋلارمەن اۋىراتىن بالالاردىڭ ءوز بەتىنشە قوزعالۋىنا كومەكتەسەتىن زاماناۋي، جوعارى تەحنولوگيالىق جانە ءتيىمدى وڭالتۋ قۇرالى.
«ادىرنا» ۇلتتىق پورتالى
