بۇگىننەن باستاپ قازاقستاندىق بانكتەر جەڭىلدەتىلگەن اۆتونەسيە بەرۋدى باستادى، دەپ حابارلايدى «ادىرنا» ءتىلشىسى.
جەڭىلدەتىلگەن نەسيە باعدارلاماسى بويىنشا قارجىلاندىرۋدىڭ جالپى سوماسى شامامەن 100 ملرد تەڭگەنى جانە قازاقستان وڭىرلەرىندەگى اۆتوبۋس پاركىن جاڭارتۋعا شامامەن 30 ملرد تەڭگەنى قۇرايدى.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، حالىققا اۆتوكولىكتى نەسيەلەندىرۋ كەلەسى شارتتارمەن جۇزەگە اسىرىلادى:
- سىياقى مولشەرلەمەسى 4%;
- نەسيە سوماسى 10 000 000 تەڭگەدەن اسپاۋى كەرەك;
- قارجىلاندىرۋ مەرزىمى 7 جىلدان اسپايدى;
- باستاپقى جارنا 0%-دان باستاپ;
- كولىك قۇنى 15 000 000 تەڭگەدەن اسپايدى.
نەسيە بەرۋدى ەكىنشى دەڭگەيدەگى بانكتەر جۇزەگە اسىراتىن بولادى.
قارجىلاندىرۋدىڭ اشىقتىعىن قامتاماسىز ەتۋ ماقساتىندا ەدب-دە تۇپكىلىكتى قارىز الۋشىعا قارجىلاندىرۋدى ۇسىنۋ مەرزىمدەرىنىڭ ساقتالۋىن باقىلاۋدىڭ اۆتوماتتاندىرىلعان جۇيەسى بولۋى شارت.
سونداي-اق ءبىر تۇپكىلىكتى قارىز الۋشىنى ەكى جىلدا ءبىر رەتتەن ءجيى ەمەس قارجىلاندىرۋ تۇرىندەگى شەكتەۋلەر بار.
«باعدارلاماعا وتاندىق اۆتوكولىكتەردى ساتاتىن بارلىق اۆتوسالون قاتىسادى. سوندىقتارن JAC, Chevrolet, KIA, LADA, UAZ, MAN, Renault, Hyundai كولىكتەرىن ساتىپ الۋعا بولادى»، - دەلىنگەن يدم حابارلاماسىندا.
ليزينگ الۋشىلار ءۇشىن اۆتوبۋستاردى ساتىپ الۋ شارتتارى تومەندەگىدەي بولادى:
- سىياقى مولشەرلەمەسى 0,01%;
- ليزينگ مەرزىمى 7 جىلعا دەيىن
- باستاپقى جارنا 0% باستاپ;
جەڭىلدەتىلگەن اۆتونەسيە تۇرىندەگى قولداۋدان باسقا، مەملەكەت جەڭىلدىك سەرتيفيكاتتارىنىڭ قولدانىلۋ مەرزىمى ماسەلەلەرىن شەشۋ شارالارىن پىسىقتاۋدا. بۇگىنگى تاڭدا وكم وپەراتورىنىڭ فۋنكتسيالارى «جاسىل دامۋ» اق-نا بەرۋىنە بايلانىستى وسىعان دەيىن پايدالانا الماعان جەڭىلدىك سەرتيفيكاتتارىن پايدالانۋعا مۇمكىندىك بەرەتىن تەتىكتەر زەردەلەنۋدە. بۇل سەرتيفيكاتتاردى پايدالانۋ جۇرگىزىلىپ جاتقان تەكسەرۋ ارەكەتتەرىنە بايلانىستى ۋاقىتشا توقتاتىلدى.
