قر پرەزيدەنتى قاسىم-جومارت توقاەۆتىڭ تۇركياعا ساپارى مەن وندا كوتەرىلگەن ماسەلەلەر تۋرالى «سۇراۋى بار» Youtube ارناسىنداعى پودكاستتا تالقىلانعان. بەلگىلى جۋرناليست، ساراپشى امانگەلدى قۇرمەتۇلى كوپشىلىك ايتىپ جۇرگەن تۇران وداعىنىڭ ىقتيمالدىعى تۋرالى پىكىر بىلدىرگەن.
«تۇران وداعى ماسەلەسىنە كەلسەك، ازىرگە الداعى 20 جىلدا ونىڭ مۇمكىن ەمەس ەكەنىن كۇللى تۇركى مەملەكەتتەرى بىلەدى. ويتكەنى تۇركى مەملەكەتتەرى ۇيىمىنىڭ ءوز دامۋ باعىتى بار. سونىمەن بىرگە ەكىنشى دەڭگەيلى مەملەكەتتەردىڭ باسشىلارى قانداي دا ءبىر اسكەري وداققا ۇيىمداسا باستاۋ تىكە وزىنە قاتەر توندىرەتىنىن بىلەدى. سوندىقتان توقاەۆتىڭ تۇركياعا ساپارىندا بۇل تۋرالى اڭگىمە بولدى دەگەنگە سەنۋ قيىن»، - دەدى امانگەلدى قۇرمەتۇلى.
ول سونىمەن قاتار تۇركى حالىقتارىنىڭ بىرىگە الماي كەلە جاتقانى تەك بۇگىن ەمەس ەكەنىن العا تارتادى.
«ءسوزدىڭ اشىعىن ايتاتىن بولساق، سوڭعى مىڭ جىلدا تۇركى حالىقتارى جۇدىرىقتاي جۇمىلىپ ارەكەت ەتكەن ەمەس. وعىزدار، وعىزداردىڭ ىشىنەن سەلجۇقتار ءبولىندى. ارقايسى جەكە-جەكە. قىپشاق توبى جەكە يمپەريا. بۇرىن ءبىر قاۋىم بولعان ەلدەردەن ەتنوستار بولىنە باستاعان كەزدە پاسسيونارلىق قۋاتى مىقتى تايپالاردىڭ ارقايسى ءوز مۇددەسىن قورعادى، اركىم ءوز ەركىنشە مەملەكەت قۇردى. سونىڭ ءبىرى وسمان يمپەرياسى، ءبىرى التىن وردا»، - دەيدى ول.
«ال قازىرگى جاعدايعا قاراساق سوڭعى 30 جىلدا ودكب-دان (ۇجىمدىق قاۋىپسىزدىك شارتى ۇيىمى) باسقا اسكەري وداقتىڭ قۇرىلعانىن كوردىڭىز با؟ ۇجىمدىق قاۋىپسىزدىك شارتى دەگەن – تمد كەڭىستىگىندەگى شىنايىلىعىنان گورى دەكلوراتيۆتىك سيپاتى باسىم ۇيىم. ال ءبىز تۇركى بىرلىگىنە كوبىنە ميليتاريستىك، اسكەري كۇش تۇرعىسىنان قارايمىز. ەگەر ءوزارا ىنتىماق-بىرلىكتى نىعايتقىمىز كەلسە ەڭ ءبىرىنشى ساۋدا-ەكونوميكالىق، ودان كەيىن مادەني-گۋمانيتارلىق وداق دەڭگەيىنە جەتۋ كەرەك»، - دەپ پىكىر ءبىلدىردى مامان.
شىعارىلىمنىڭ تولىق نۇسقاسىن تومەندەگى سىلتەمە ارقىلى كورە الاسىز:
"ادىرنا" ۇلتتىق پورتالى
