الماتىداعى ءبىرىنشى سىنىپ وقۋشىسى زورلانعان جەكەمەنشىك مەكتەپتە ارنايى كوميسسيا كوپتەگەن زاڭ بۇزۋشىلىقتاردى انىقتادى، دەپ حابارلايدى "ادىرنا" ۇلتتىق پورتالى كتك ارناسىنا سىلتەمە جاساپ.
ءبىلىم مەكەمەسىن تەكسەرۋ ءۇشىن بالالار قۇقىعىن قورعاۋ كوميتەتىنىڭ توراعاسى مەن ءبىلىم مينيسترلىگىنىڭ شتاتتان تىس كەڭەسشىسى كەلدى. مەكتەپتە قاۋىپسىزدىك شارالارى، سانيتارلىق-گيگيەنالىق جانە باسقا دا ەرەجەلەر ساقتالماعان بولىپ شىقتى.
— بەينەكامەرالار بويىنشا بىرقاتار زاڭبۇزۋشىلىقتار، سانيتارلىق-گيگيەنالىق تالاپتاردىڭ بۇزىلۋى بار. سونداي-اق مەكتەپتى جارىقتاندىرۋ، قۇجاتتامانى جۇرگىزۋ بويىنشا دا. وقۋ-تاربيە پروتسەسىندە دە بىرقاتار بۇزۋشىلىقتار انىقتالدى. ال بۇگىندە ءىستىڭ بارلىعى ءبىلىم ساپاسىن باقىلاۋ كوميتەتىنە بەرىلدى، – دەيدى قر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ەسەنعازى يمانعاليەۆ.
ەسكە سالساق، ءبىلىم مەكەمەسىنە قاتىستى ايىپ اتا-انالاردىڭ ءبىرى بىرنەشە كۇن بۇرىن تاققان ەدى. ءبىرىنشى سىنىپ وقۋشىسىنىڭ اكەسى ۇلىنىڭ دەنەسىنەن كوگەرگەن جەرلەردى بايقاعان، كەيىن ونىڭ كيىمىنەن اق ءتۇستى بەلگىسىز داقتاردى بايقاعان.
اكەسىنىڭ ايتۋىنشا، بالاسىن مەكتەپ اجەتحاناسىندا زورلاعان سوڭ، ول پوليتسياعا جۇگىنگەن. ەر ادام تەك جوعارى سىنىپ وقۋشىلارىن عانا ەمەس، ولاردىڭ اتا-انالارىن دا، مەكتەپ ديرەكتورى مەن مۇعالىمدەرىن دە جازالاۋدى تالاپ ەتەدى. قازىر زارداپ شەككەن بالامەن پسيحولوگتار جۇمىس ىستەپ جاتىر.
"ادىرنا" ۇلتتىق پورتالى.
