قازاقستاننىڭ رەسەيدەگى ەلشىسى ەرمەك كوشەرباەۆ ومبى وبلىسىنا جۇمىس ساپارى بارىسىندا ءوڭىر گۋبەرناتورى الەكساندر بۋركوۆقا ءىى دارەجەلى "دوستىق" وردەنىن تابىس ەتىپ، قالاداعى شوقان ءۋاليحانوۆتىڭ ەسكەرتكىشى مەن كەمەل توقاەۆقا ارنالعان مەموريالدىق تاقتاعا گۇل شوقتارىن قويدى، دەپ حابارلايدى "ادىرنا" ۇلتتىق پورتالى "sputnik.kz"-كە سىلتەمە جاساپ.
ەرمەك كوشەرباەۆ گۋبەرناتورمەن ىنتىماقتاستىقتىڭ بارلىق سالاسى بويىنشا كەڭ اۋقىمدى ماسەلەلەردى، ونىڭ ىشىندە ومبى وبلىسى دەلەگاتسياسىنىڭ ءساۋىر ايىنداعى قازاقستانعا ساپارى كەزىندە قول جەتكىزىلگەن ۋاعدالاستىقتاردى جانە مەملەكەت باسشىسى قاسىم-جومارت توقاەۆپەن جۇرگىزىلگەن كەلىسسوزدەردى تالقىلادى.
— مادەني-گۋمانيتارلىق ىنتىماقتاستىق تا قارقىندى دامۋدا. ومبى وبلىسىندا قازاق مادەنيەتىن ناسيحاتتايتىن ءىس-شارالار، جەتەكشى كاسىبي شىعارماشىلىق ۇجىمداردىڭ قاتىسۋىمەن فەستيۆالدەر، تەاترلار مەن فيلارمونيالاردىڭ گاسترولدەرى وتكىزىلەدى. حالىق ساناعىنىڭ قورىتىندىسى بويىنشا وڭىردەگى سانى شامامەن 78-80 مىڭ ادامدى قۇرايتىن قازاق دياسپوراسى قازاقستانمەن رۋحاني كوپىر بولىپ تابىلادى", - دەلىنگەن قازاقستاننىڭ رەسەيدەگى ەلشىلىگى تاراتقان حابارلامادا.
ايتا كەتۋ كەرەك، ومبىداعى كەمەل توقاەۆتىڭ مەموريالدىق تاقتاسى 2020 جىلى اشىلعان بولاتىن.
"ادىرنا" ۇلتتىق پورتالى
