Qazaqstannyŋ Reseidegı elşısı Ermek Köşerbaev Omby oblysyna jūmys sapary barysynda öŋır gubernatory Aleksandr Burkovqa II därejelı "Dostyq" ordenın tabys etıp, qaladaǧy Şoqan Uälihanovtyŋ eskertkışı men Kemel Toqaevqa arnalǧan memorialdyq taqtaǧa gül şoqtaryn qoidy, dep habarlaidy "Adyrna" ūlttyq portaly "sputnik.kz"-ke sılteme jasap.
Ermek Köşerbaev gubernatormen yntymaqtastyqtyŋ barlyq salasy boiynşa keŋ auqymdy mäselelerdı, onyŋ ışınde Omby oblysy delegasiiasynyŋ säuır aiyndaǧy Qazaqstanǧa sapary kezınde qol jetkızılgen uaǧdalastyqtardy jäne memleket basşysy Qasym-Jomart Toqaevpen jürgızılgen kelıssözderdı talqylady.
— Mädeni-gumanitarlyq yntymaqtastyq ta qarqyndy damuda. Omby oblysynda qazaq mädenietın nasihattaityn ıs-şaralar, jetekşı käsıbi şyǧarmaşylyq ūjymdardyŋ qatysuymen festivalder, teatrlar men filarmoniialardyŋ gastrolderı ötkızıledı. Halyq sanaǧynyŋ qorytyndysy boiynşa öŋırdegı sany şamamen 78-80 myŋ adamdy qūraityn qazaq diasporasy Qazaqstanmen ruhani köpır bolyp tabylady", - delıngen Qazaqstannyŋ Reseidegı elşılıgı taratqan habarlamada.
Aita ketu kerek, Ombydaǧy Kemel Toqaevtyŋ memorialdyq taqtasy 2020 jyly aşylǧan bolatyn.
"Adyrna" ūlttyq portaly
