تاشكەنتتە ەرلەردەن ساقالىن قىرۋدى تاعى تالاپ ەتىپ جاتىر. ساقالدى جىگىتتەردى ىشكى ىستەر بولىمشەسىنە شاقىرىپ، 15 تاۋلىككە قامايمىز دەپ ەسكەرتۋ جاساعان، دەپ حابارلايدى "ادىرنا" پورتالى گازەتا.ۋز سايتىنا سىلتەپ.
وتكەن اپتادا الەۋمەتتىك جەلىلەردە تاشكەنت اۋداندارىندا ساقالدى ەر ادامداردى ۇستاپ، ىشكى ىستەر بولىمشەسىنە اپارىپ، ساقالىن العان سوڭ بوساتىپ جاتقانى جايىندا اقپارات تاراعان.
ابدۋراحمون مۋفيد (Abu Vines) دەگەن لاقاپ اتىمەن تانىمال ابدۋراحمون ابدۋراحمونوۆ ەسىمدى ۆاينەر Instagram (1,3 ميلليون جازىلۋشىسى بار) پاراقشاسىنا ساقالسىز سۋرەتىن جاريالاعان.
"بارلىق نارسەدە دانالىق بار. كورىپ تۇرعانىڭىزداي، ساقال الىندى. نە ءۇشىن قىرعانىمدى سۇراماڭىز. ادامداردىڭ وزدەرى تۇسىنەدى دەپ ويلايمىن. شىعارماشىلىقتى جالعاستىرا بەرەمىن", - دەپ جازعان.
Facebook قولدانۋشىسى مۋحامماديۋسۋف يبن كوبيل 6 مامىر كۇنى جەلىگە ساقالىن العان سۋرەتىن جاريالادى. ول ىشكى ىستەر بولىمشەسىنە بارعاننان كەيىن وسىلاي بولدى دەگەن.
مۋحامماديۋسۋف بولىمشەدە وزىمەن بىرگە كەمىندە ون ادامنىڭ بولعانىن ايتادى. ولاردىڭ بارىنەن ساقالىن الۋدى تالاپ ەتكەن.
"ەگەر ساقالىڭدى قازىر قىرماساڭ، 15 تاۋلىككە قامايمىز" دەگەن پوليتسيا وكىلدەرى.
وزبەكستان ىشكى ىستەر مينيسترلىگىنىڭ ءباسپاسوز حاتشىسى شوحرۋح گياسوۆ بۇل وقيعاعا قاتىستى بىلايشا پىكىرىن ءبىلدىردى:
"بۇل وقيعالاردى قۇقىق قورعاۋ ورگاندارى جۇرگىزىپ جاتقان قىلمىسقا قارسى كۇرەس شاراسىمەن سالىستىرۋعا كەلمەيدى. ازاماتتار ەگەر كونستيتۋتسيالىق قۇقىعىمىز بۇزىلدى دەسە، شاعىمدانسا بولادى", - دەدى ول.
بۇل وزبەكستاندا ەر ازاماتتاردىڭ ساقالىن ماجبۇرلەپ العىزىپ جاتقان ءبىرىنشى جاعداي ەمەس. 2019 جىلى دا وسىنداي رەيد جۇرگەن.
"ادىرنا" ۇلتتىق پورتالى
