ۋكرايناداعى قاقتىعىس، قۇرعاقشىلىق جانە كوروناۆيرۋستىق پاندەميانىڭ سالدارى بۇكىل الەمدە اشارشىلىقتىڭ بولۋىنا اكەلۋى مۇمكىن. بۇل تۋرالى گەرمانيانىڭ ەكونوميكالىق ىنتىماقتاستىق جانە دامۋ ءمينيسترى سۆەنيا شۋلتسە Bild باسىلىمىنا بەرگەن سۇقباتىندا ايتتى، دەپ حابارلايدى «ادىرنا» ءتىلشىسى.
«دۇنيەجۇزىلىك ازىق-تۇلىك باعدارلاماسىنا سايكەس، الەمدە 300 ميلليون ادام اشتىقتان زارداپ شەگەدى جانە بۇل ستاتيستيكا كۇن سايىن ءوسىپ وتىر. وكىنىشتى، بىراق ءبىز ميلليونداعان ادام قازا بولعان ەكىنشى دۇنيەجۇزىلىك سوعىستان كەيىنگى ەڭ اۋىر اشارشىلىقپەن بەتپە-بەت كەزدەسۋىمىز مۇمكىن»،– دەدى ول.
بۇعان دەيىن بۇۇ باس حاتشىسى انتونيۋ گۋتەرريش ۋكرايناداعى داعدارىس بۇكىل ادامزاتتىڭ بەستەن بىرىنەن استامىن كەدەيلىك پەن اشتىققا باتىرۋى مۇمكىن ەكەنىن ايتقان. ونىڭ پايىمداۋىنشا، 1,7 ميللياردقا جۋىق ادام زارداپ شەگۋى ىقتيمال.
گۋتەرريش بيداي مەن ارپانىڭ الەمدىك ءوندىرىسىنىڭ شامامەن 30%-ى، جۇگەرىنىڭ بەستەن ءبىرى جانە كۇنباعىس مايىنىڭ 50%-دان استامى ۋكراينا مەن رەسەيدىڭ ۇلەسىندە ەكەنىن اتاپ ءوتتى. بۇل ەلدەردەن استىقتى جەر شارىنىڭ ناشار دامىعان 45 ەلى يمپورتتايدى.
«ادىرنا» ۇلتتىق پورتالى
