قازاقستان پرەزيدەنتى قاسىم-جومارت توقاەۆپەن اتتاس 12 جاستاعى بالا تۇراتىن قوستاناي وبلىسى ۇشتوعاي اۋىلىندا ءالى كۇنگە دەيىن ۇيالى بايلانىس پەن ينتەرنەت جوق، دەپ حابارلايدى "ادىرنا" ۇلتتىق پورتالى "استانا" تەلەارناسىنا سىلتەمە جاساپ.
12 جاستاعى قاسىم-جومارت توقاەۆ ۇشتوعاي اۋىلىنداعى مەكتەپتە وقيدى. بالانىڭ اتىن تاتەسى تاڭداعان. وقۋشى ءوزىنىڭ ەسىمى ەل پرەزيدەنتىمەن بىردەي ەكەنىنە ماقتانادى.
"مەنىڭ ارمانىم - قاسىم-جومارت توقاەۆپەن كەزدەسۋ. كەزدەسسەم، مىندەتتى تۇردە ءبىزدىڭ اۋىلعا ۇيالى بايلانىس پەن ينتەرنەت جۇرگىزۋىن سۇرايمىن", - دەيدى بالا.
ۇشتوعاي مەكتەبىندە 50-دەن اسا وقۋشى بار. مۇندا ينتەرنەت قولجەتىمسىز. مۇعالىمدەر ۇيالى بايلانىس پەن ينتەرنەت بولسا، بالالاردى وقىتۋ ءىسى مۇلدەم باسقا دەڭگەيدە وتەتىنىنە سەنىمدى. ازىرگە مەكتەپ وقۋشىلارى دا، مۇعالىمدەر دە زاماناۋي قوسىمشالار مەن جەتىستىكتەرگە قول جەتكىزە الماي وتىر.
"بۇل ماسەلەنى شەشۋ ءۇشىن بايلانىس جۇيەلەرىن جۇرگىزۋمەن اينالىساتىن قۇزىرەتتى ورگاندارعا جۇگىندىك. جىل اياعىنا دەيىن ناتيجە بولادى دەپ ۇمىتتەنەمىز", - دەدى امانگەلدى اۋدانىنىڭ اكىمى تالعات قاربوزوۆ.
اۋدان بيلىگى ۇيالى بايلانىس ماسەلەسى الداعى ءۇش-ءتورت ايدا تولىعىمەن شەشىلەتىنىنە ۋادە بەردى. ۇشتوعاي جانە ستەپنياك اۋىلدارىندا مۇنارانى كۇزگە قاراي ورناتۋعا ۋادە بەرىپ وتىر. قالعان ەلدى مەكەندەردە ۇيالى بايلانىس پەن ينتەرنەت كەلەسى جىلى قولجەتىمدى بولادى.
